మంత్రివర్గ విస్తరణ ఉంటుంది, సిఎం చెప్తారు: రాయపాటి

న్యూఢిల్లీ: ముఖ్యమంత్రి కె. రోశయ్య మంత్రివర్గ విస్తరణ ఈసారి కచ్చితంగా ఉంటుందని కాంగ్రెసు పార్లమెంటు సభ్యుడు రాయపాటి సాంబశివ రావు చెప్పారు. ఆయన ఓ ప్రైవేట్ తెలుగు టీవీ చానెల్ ప్రతినిధితో మంగళవారం మాట్లాడారు. పార్టీ అధిష్టానంతో మాట్లాడిన తర్వాత ముఖ్యమంత్రి ఆ విషయం చెప్తారని ఆయన అన్నారు. ముఖ్యమంత్రి మార్పుపై తన వద్ద సమాచారం లేదని ఆయన అన్నారు. రాష్ట్రంలోని తాజా రాజకీయ పరిణామాలపై చర్చించడానికే ముఖ్యమంత్రి ఢిల్లీ వస్తున్నారని ఆయన చెప్పారు.

ఢిల్లీ బయలుదేరిన ముఖ్యమంత్రి రోశయ్య నేరుగా పార్లమెంటు హాల్ కు వస్తారని సమాచారం. పార్లమెంటు హాల్లోనే కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీని, ఇతర నాయకులను ఆయన కలిసే అవకాశం ఉంది. కాంగ్రెసు అధ్యక్షురాలు సోనియా గాంధీ అపాయింట్ మెంట్ ఇంత వరకు ఖరారు కాలేదని తెలుస్తోంది.