అవసరమైతే మంత్రివర్గంలో చేరుతాం: ప్రజారాజ్యం అధినేత చిరంజీవి

న్యూఢిల్లీ: కాంగ్రెసు పార్టీలో జరుగుతున్న పరిణామాలు ఆ పార్టీ అంతర్గత విషయాలని ప్రజారాజ్యాం వ్యవస్థాపక అధ్యక్షుడు చిరంజీవి బుధవారం విలేకరులతో అన్నారు. తమకు కాంగ్రెసు పార్టీ అధిష్టానం నుండి కేబినేట్లో చేరే ఎలాంటి ప్రతిపాదన రాలేదన్నారు. ఒకవేళ అలాంటి ప్రతిపాదన ఏమైనా వస్తే పార్టీలో అందరితో చర్చించి నిర్ణయం తీసుకుంటానని చిరంజీవి చెప్పారు. ప్రజా ప్రయోజనాల దృష్ట్యా అవసరమైతే మంత్రివర్గంలో చేరే విషయాన్ని ఆలోచిస్తామని చెప్పారు. రోశయ్య ముఖ్యమంత్రిగా రాజీనామా సమర్పించటం పట్ల ఆయన స్పందించారు. ఇలా జరుగుతుందని తాను ఊహించలేదని చిరంజీవి చెప్పారు.

శాసనసభ్యులందరూ బుధవారం అందుబాటులో ఉండాలని ప్రజారాజ్యం వ్యవస్థాపక అధ్యక్షుడు చిరంజీవి తమ పార్టీ శాసనసభ్యులకు ఆదేశాలు పంపారు. సాయంత్రం కీలక మార్పులు జరిగే అవకాశం ఉన్నందున అందరూ సిద్ధంగా ఉండాలని చెప్పినట్లు సమాచారం. రాష్ట్రంలో కాంగ్రెసు పార్టీతో కలిసి మంత్రివర్గంలో చేరడానికి ప్రజారాజ్యం సిద్ధంగా ఉన్నదనే వార్తలు గుప్పుమన్న నేపధ్యంలో చిరంజీవి వార్తలతో మరింత ప్రాధాన్యం సంతరించుకుంది.