ముఖ్యమంత్రిగా రాజీనామాపై రోశయ్యకు కూడా తెలియదా?

హైదరాబాద్: తన రాజీనామా లేఖను ముఖ్యమంత్రి కె. రోశయ్య మంగళవారం రాత్రే కాంగ్రెసు అధ్యక్షురాలు సోనియా గాంధీకి సమర్పించినట్లు వచ్చిన వార్తల్లో నిజం లేదని తెలుస్తోంది. తాజాగా వెల్లడైన విషయాల ప్రకారం, రోశయ్యకు కూడా తన రాజీనామా సంగతి కొత్త విషయమేనని అంటున్నారు. బుధవారం ఉదయం అధిష్టానవర్గానికి చెందిన ఓ నాయకుడు ఫోన్ చేసి ఎప్పుడు రాజీనామా చేస్తున్నారని అడిగారని, దానికి ఆశ్చర్యపోయిన రోశయ్య వెంటనే సర్దుకుని మధ్యాహ్నం చేస్తానని చెప్పారని అంటున్నారు. దాంతో మధ్యాహ్నం మీడియా ప్రతినిధుల సమావేశం ఏర్పాటు చేసి తన రాజీనామా గురించి ప్రకటించి గవర్నర్ నరసింహన్ వద్దకు వెళ్లి రాజీనామా సమర్పించినట్లు చెబుతున్నారు.

మంగళవారం ఢిల్లీలో కూడా రోశయ్యకు అధిష్టానం పెద్దల నుంచి ఆశ్చర్యకరమైన ప్రశ్నలు ఎదురైనట్లు చెబుతున్నారు. రాష్ట్రంలో పరిస్థితి ఏమిటి, ఫ్రీజోన్ రగడ ఎంత వరకు వచ్చింది, రాష్ట్రంలో శాంతిభద్రతల పరిస్థితి ఏమిటి వంటి ప్రశ్నలు వేసినట్లు తెలుస్తోంది. బుధవారం సాయంత్రం సిఎల్పీ సమావేశం ఏర్పాటు విషయం కూడా తొలుత రోశయ్యకు చెప్పలేదని అంటున్నారు. మంగళవారం రాత్రి పొద్దుపోయిన తర్వాత విషయం చెప్పారని సమాచారం. సిఎల్పీ సమావేశం ఎజెండా కూడా రోశయ్యకు చెప్పలేదని అంటున్నారు. ఈ స్థితిలోనే గవర్నర్ కు రాజీనామా సమర్పించిన తర్వాత ఏమీ మాట్లాడకుండా ఇంటికి వెళ్లిపోయినట్లు చెబుతున్నారు.