ముఖ్యమంత్రిగా నిన్న రాత్రే రోశయ్య రాజీనామా చేశారా?

హైదరాబాద్: ముఖ్యమంత్రి పదవికి కె. రోశయ్య ఇప్పటికే రాజీనామా చేసినట్లు వార్తలు వస్తున్నాయి. తన రాజీనామా లేఖను పార్టీ అధ్యక్షురాలు సోనియా గాంధీకి ఇచ్చినట్లు తెలుగు టీవీ చానెళ్లు వార్తలు ప్రసారం చేస్తున్నాయి. ఆ విషయం చెప్పడానికి మాత్రమే రోశయ్య సోనియాను మంగళవారం కలిసినట్లు చెబుతున్నారు. బుధవారం సాయంత్రం జరిగే సిఎల్పీ సమావేశంలో రోశయ్య ధన్యవాదాలు చెబుతారని అంటున్నారు. ఇదే సమయంలో కొత్త నేతను పార్టీ అధిష్టానం ఎంపిక చేసినట్లు చెబుతున్నారు.

సీల్డ్ కవర్ లో పార్టీ అధిష్టానం దూతలు సిఎల్పీ సమావేశంలో విప్పనున్నట్లు తెలుస్తోంది. కాంగ్రెసు అధిష్టానానికి చెందిన వీరప్ప మొయిలీతో పాటు అహ్మద్ పటేల్, ప్రణబ్ ముఖర్జీ కూడా ఆ సమావేశానికి వస్తుండడం ఆ వార్తలకు బలం చేకూరుస్తున్నాయి. ఈ సమావేశంలో తమ తమ వాదనలను వినిపించడానికి వివిధ కాంగ్రెసు గ్రూపులు సమాయత్తమవుతున్నాయి. తెలంగాణ సమస్యను పరిష్కరించే నేతను సిఎంగా ఎంపిక చేయాలనే ఆలోచనలో కూడా అధిష్టానం ఉన్నట్లు తెలుస్తోంది.