నేను అనని మాటలు అంటగడుతున్నారు: బహిరంగ లేఖలో చంద్రబాబు

హైదరాబాద్: వ్యవసాయం దండుగ అని నేను అనని మాటలను కాంగ్రెస్ పార్టీవారు నాకు అంటగట్టే యత్నాలు చేస్తున్నారని మాజీ ముఖ్యమంత్రి, తెలుగుదేశం పార్టీ అధ్యక్షుడు చంద్రబాబునాయుడు ఆదివారం రైతులకు రాసిన బహిరంగ లేఖలో పేర్కొన్నారు. నా తల్లిదండ్రులు ఆఖరి శ్వాస వరకు నేలనే నమ్ముకున్నారన్నారు. ప్రభుత్వం రైతుల సమస్యలపై స్పందించక పోవటం వల్లనే రైతు బిడ్డగా రైతు రుణం తీర్చుకునేందుకు నా పోరాటం అని చంద్రబాబు ఆ లేఖలో అన్నారు. అందుకే మహాత్మా గాంధీ చూపిన సత్యాగ్రహ బాటలోనే నేను సమస్యలపై ప్రభుత్వంపై పోరాడుతున్నానని చెప్పారు.

మొండి ప్రభుత్వం మెడలు వంచేదాకా రైతులకు న్యాయం జరిగే వరకు పోరాడుతానని ఆయన అన్నారు. కష్టాన్ని నమ్ముకున్న నాకు అన్నదాతల ఆత్మహత్యలు, వారి కష్టాలు కలిచి వేస్తున్నాయన్నారు. రైతులు మనోస్థైర్యం ఎట్టి పరిస్థితుల్లోనూ వీడవద్దని ఆయన కోరారు. రైతులకు అండగా నేను, తెలుగుదేశం పార్టీ ఉందని ప్రకటించారు. ప్రకృతి విపత్తుల వలన రాష్ట్రం ఆస్తవ్యస్తం కావటం ఇదే మొదటిసారి అని ఆయన లేఖలో చెప్పారు.