2జి స్పెక్ట్రమ్ స్కామ్: మాజీ మంత్రి రాజాకు సిబిఐ సమన్లు

న్యూఢిల్లీ‌: 2జి స్పెక్ట్రమ్ కుంభకోణంలో కేంద్ర దర్యాప్తు సంస్థ (సిబిఐ) సోమవారం టెలికం మాజీ మంత్రి ఎ. రాజా సమన్లు జారీ చేసింది. విచారణ కోసం తమ ముందు హాజరు కావాలని సిబిఐ సోమవారం రాజాకు నోటీసు ఇచ్చింది. ఈ నేపథ్యంలో తమిళనాడు ముఖ్యమంత్రి కరుణానిధిని రాజా సోమవారం కలిసే అవకాశం ఉంది. డిసెంబర్ 15వ తేదీన సిబిఐ ఢిల్లీ, చెన్నైల్లో 34 చోట్ల దాడులు నిర్వహించిన నేపథ్యంలో రాజాకు సమన్లు జారీ చేసింది.

2జి స్పెక్ట్రమ్ స్కామ్ కు సంబంధించి కార్పొరేట్ లాబీయిస్టు నీరా రాడియాకు సిబిఐ నోటీసులు జారీ చేసింది. ట్రాయ్ మాజీ చైర్మన్ ప్రదీప్ బైజాల్, రాజా సహాయకులు ఆర్రె చండోలియా, ఎకె శ్రీవాత్సవలను, రాజా సోదరుడు ఆందిముత్తును, నక్కీరన్ అసోసియేట్ ఎడిటర్ ఎ కామరాజ్ ను, తదితరులను సిబిఐ ఈ వారంలో ప్రశ్నించే అవకాశం ఉంది.