కెసిఆర్ ఎఫెక్ట్: సోనియా గాంధీకి తెలంగాణ నేతల మొర

న్యూఢిల్లీ: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తెలంగాణ మహాగర్జన ప్రభావం కాంగ్రెసు తెలంగాణ నాయకులను కదిలించింది. తెలంగాణపై ప్లీనరీ సమావేశంలో కాంగ్రెసు పార్లమెంటు సభ్యుడు పొన్నం ప్రభాకర్ గొంతు చించుకుని తెలంగాణ రాష్ట్రం ఏర్పాటు చేయాలంటూ మాట్లాడారు. తెలంగాణ పార్లమెంటు సభ్యులు సర్వే సత్యనారాయణ, వివేక్ తదితరులు ప్లీనరీ సమావేశంలో జై తెలంగాణ నినాదాలు చేశారు. తెలంగాణ రాష్ట్రం ఏర్పాటు చేయాలంటూ సోనియాకు ఓ వినతిపత్రం సమర్పించారు. తెలంగాణ ఏర్పాటు చేయాలని కోరుతూ సోనియాకు సమర్పించిన వినతిపత్రంపై 13 మంది పార్లమెంటు సభ్యులు, ఢిల్లీలో ఉన్న 32 మంది శాసనసభ్యులు సంతకాలు చేసినట్లు వివేక్ మీడియా ప్రతినిధులకు చెప్పారు.

జై తెలంగాణ కాంగ్రెసు నినాదమని సర్వే సత్యనారాయణ మీడియా ప్రతినిధులతో అన్నారు. తెలంగాణను విలీనం చేసి ఆంధ్రప్రదేశ్ రాష్ట్రాన్ని ఏర్పాటు చేయడం కాంగ్రెసు తెలంగాణ నాయకులకు మొదటి నుంచీ ఇష్టం లేదని ఆయన అన్నారు. జై తెలంగాణ కొత్త నినాదం కాదని, మొదటి నుంచీ తాము ఆ నినాదం చేస్తూనే ఉన్నామని ఆయన చెప్పారు. తెలంగాణ రాష్ట్ర ఏర్పాటు కోసం 1969లో తాను రాళ్లు పట్టుకున్నవాడినే అని ఆయన అన్నారు. కెసిఆర్ హెచ్చరికల వల్ల తాము జై తెలంగాణ నినాదం ఇస్తున్నామనడంలో నిజం లేదని ఆయన అన్నారు.