అవినీతికి కాంగ్రెసు ఎప్పుడూ వ్యతిరేకమే: ప్లీనరీలో ప్రధాని మన్మోహన్ సింగ్

న్యూఢిల్లీ: భారతదేశ అభివృద్ధి కాంగ్రెసు తోనే సాధ్యమవుతుందని ప్రధానమంత్రి మన్మోహన్ సింగ్ సోమవారం న్యూఢిల్లీలో జరుగుతున్న కాంగ్రెసు ప్లీనరీలో వ్యాఖ్యానించారు. ప్రజలు కాంగ్రెసు కు తమ మద్దతు ప్రకటిస్తున్నారని చెప్పారు. కాంగ్రెసు ఎప్పుడు పేదవారి అభివృద్ధికి కృషి చేస్తుందన్నారు. అవినీతిని కాంగ్రెసు ఎప్పుడూ వ్యతిరేస్తుందన్నారు. అవినీతిని అంతం చేయటమే కాంగ్రెసు లక్ష్యమన్నారు. కొన్ని కుంభకోణాలపై వచ్చిన అవినీతి ఆరోపణలపై కేంద్ర ప్రభుత్వం విచారణ జరిపిస్తుందన్నారు. దోషులను ఎంతటివారినైనా కఠినంగా శిక్షించడానికి కేంద్ర ప్రభుత్వం సిద్ధంగా ఉందన్నారు.

దేశంలో కాంగ్రెసు పార్టీ బలంగా ఉంటేనే భారతదేశం స్థిరంగా ఉంటుందని మన్మోహన్ చెప్పారు. దేశాన్ని ముందుకు నడిపించగల సత్తా కాంగ్రెసు పార్టీకే ఉందన్నారు. కింది స్థాయి సామాన్య కార్యకర్తలను కూడా కలుపుకుని ముందుకు వెళ్లాలని ఆయన నాయకులకు సూచించారు. ప్రజల సంక్షేమమే మన లక్ష్యంగా పని చేయాలని ఆయన పార్టీ నేతలకు పిలుపునిచ్చారు. రాష్ట్రాల్లో ఏ ప్రభుత్వము ఉన్నప్పటికీ అందరినీ సమానంగానే చూస్తున్నామని చెప్పారు. రాజకీయ అవసరాల కోసం కొందరు పార్టీని బలహీనపరచాలని చూస్తున్నారన్నారు.