మెజార్టీ లేకున్నా అవిశ్వాస తీర్మానం ప్రతిపాదిస్తాం: నాగం

హైదరాబాద్: రైతుల సమస్యలపై నిరవధిక నిరాహార దీక్ష చేస్తున్న తెలుగుదేశం పార్టీ అధ్యక్షుడు నారా చంద్రబాబునాయుడు వైద్యానికి నిరాకరిస్తున్నారని ఆ పార్టీ సీనియర్ నాయకుడు నాగం జనార్ధన్ రెడ్డి సోమవారం చెప్పారు. నిమ్స్ లో చేరిన తర్వాత చంద్రబాబు ఆరోగ్యం మెరుగైందన్న ఆరోగ్యశాఖమంత్రి డిఎల్ రవీంద్రారెడ్డి వ్యాఖ్యలను ఆయన కొట్టి పారేశారు. చంద్రబాబు అరెస్టు చేసేటప్పుడు పోలీసులు దౌర్జన్యంగా వ్యవహరించారన్నారు. శిబిరంనుండి చంద్రబాబు తనయుడిని తోసి వేశారన్నారు. అరెస్టుకు ముందు చంద్రబాబు ఆరోగ్యం బాగానే ఉన్నట్టు మేం చెప్పామన్నారు.

చంద్రబాబు దీక్ష విరమించాలంటున్న ప్రభుత్వం ఆయన డిమాండ్లు పరిష్కరించాలన్నారు. రైతులు గుండె పగిలి చనిపోతున్నారన్నారు. ఇంటికి రావాల్సిన ధాన్యం నీళ్లలో మునిగి పోతుందన్నారు. రైతుల సర్వం కోల్పోయి దిక్కు తోచని స్థితిలో ఉంటే ఈ ప్రభుత్వం పట్టించుకోవటం లేదన్నారు. ప్రధానమంత్రి వేసిన కమిటీ రిపోర్టు ప్రకారం ఎకరానికి పదివేల రూపాయలు ఇవ్వాలని డిమాండ్ చేస్తున్నామన్నారు. రైతులు కష్టాల్లో ఉంటే ప్రభుత్వం ఢిల్లీలో ఉందన్నారు. ముఖ్యమంత్రిని దించడానికి మాకు మెజారిటీ లేదన్నారు. అయినా రైతు వ్యతిరేక చర్యలను ఖండిస్తూ అవిశ్వాస తీర్మానానికి వెనుకాడేది లేదన్నారు.