ప్రభుత్వంపై అవిశ్వాసంపై ఆలోచిద్దాం: కార్యకర్తలకు బాబు సూచన

హైదరాబాద్: రైతుల సమస్యల పరిష్కారానికి నిరవధిక నిరాహారదీక్ష చేపట్టిన తెలుగుదేశం పార్టీ అధ్యక్షుడు చంద్రబాబునాయుడిని అరెస్టును నిరసిస్తూ కొందరు పార్టీ సీనియర్ నేతలు ప్రభుత్వంపై అవిశ్వాస తీర్మానం ప్రవేశ పెడతామని ప్రకటించడంపై ఆ పార్టీ అధ్యక్షుడు చంద్రబాబు నాయుడు స్పందించారు. అవిశ్వాస తీర్మానం ప్రవేశ పెట్టాలని అనుకుంటే రాష్ట్రంలోని ఇతర పార్టీలతో సమాలోచనలు జరిపిన తర్వాతనే అవిశ్వాస తీర్మానం విషయం ఆలోచించాలని సూచించారు. వామపక్షాలు, కలిసి వచ్చే ఇతర పార్టీలతో కలిసి ఉద్యమాన్ని ఉధృతం చేయాలని సూచించారు.

కాగా అంతకుముందు తెలుగుదేశం పార్టీ సీనియర్ నాయకుడు పయ్యావుల కేశవ్ చంద్రబాబు అరెస్టుకు నిరసనగా కిరణ్ కుమార్ రెడ్డి ప్రభుత్వంపై అవిశ్వాస తీర్మానం ప్రవేశ పెట్టేదిశలో ఆలోచిస్తామని చెప్పారు. ప్రతిపక్ష నాయకుడు, మాజీ ముఖ్యమంత్రి అయిన చంద్రబాబును నిర్ధాక్షిణ్యంగా ప్రభుత్వం అరెస్టు చేయించడం ఎంత వరకు సమంజసమన్నారు. రైతులు, ప్రజలు కాంగ్రెసు ప్రభుత్వంపై తీవ్ర ఆగ్రహంతో ఉన్నారని ధ్వజమెత్తారు. దీక్ష భగ్నం చేసిన మంగళవారం నుండి నియోజవర్గ స్థాయిల్లో ఆందోళనలు ఉధృతం చేస్తామని ప్రకటించారు.