తెలంగాణ రాకుంటే చివరి అస్త్రంగా రాజీనామా: ఎంపీలు గుత్తా, రాజయ్య

హైదరాబాద్: పార్లమెంటులో తెలంగాణ బిల్లు పెట్టినప్పుడు మా అవసరం ఉంటుందని పార్లమెంటు సభ్యులు గుత్తా సుఖేందర్ రెడ్డి, సిరిసిల్ల రాజయ్య ఆదివారం ఓ టీవి కార్యక్రమంలో చెప్పారు. బిల్లు సమయంలో మా అవసరం ఉంటుంది కాబట్టి మేం రాజీనామా గురించి ఆలోచించటం లేదన్నారు. కేంద్రం ఏర్పాటు చేసిన శ్రీకృష్ణ కమిటీ నివేదిక ఎలా ఉన్నా మాకు సంబంధం లేదన్నారు. శ్రీకృష్ణ కమిటీ నివేదికతో సంబంధం లేకుండా కేంద్రం డిసెంబర్ 9నాటి ప్రకటనకు కట్టబడి ఉండాలని కోరారు.

తెలంగాణ ఏర్పాటే మా ఏకైన నినాదమని చెప్పారు. డిసెంబర్ 31 తర్వాత రాష్ట్రంలో ఎలాంటి అవాంఛనీయ సంఘటనలు జరగవని రాష్ట్రం మొత్తం ప్రశాంతంగా ఉంటుందని ఓ వైపు ముఖ్యమంత్రి చెబుతుంటే మరోవైపు డిజిపి మాత్రం ప్రత్యేక బలగాలను రాష్ట్రానికి దించుతున్నారన్నారు. ప్రతి దానికి రాజీనామా సమాధానం కాదన్నారు. అయితే తెలంగాణకు కేంద్రం ఆమోదించకుంటే చివరి అస్త్రంగా మాత్రం రాజీనామా ఉంటుందని చెప్పారు.