ఎంపీల దీక్షకు దిగొచ్చిన కిరణ్ కుమార్ రెడ్డి: కేసుల ఎత్తివేత

హైదరాబాద్: కాంగ్రెసు తెలంగాణ ప్రాంత పార్లమెంటు సభ్యుల నిరవధిక నిరాహార దీక్షకు ముఖ్యమంత్రి ఎన్. కిరణ్ కుమార్ రెడ్డి దిగి వచ్చారు. తెలంగాణ ప్రాంత మంత్రుల దౌత్యం మేరకు ఆయన విద్యార్థులపై నమోదైన అన్ని కేసులను ఎత్తేయడానికి ఆయన అంగీకరించారు. ఈ విషయాన్ని హోం మంత్రి సబితా ఇంద్రారెడ్డి మంగళవారం మధ్యాహ్నం మీడియా ప్రతినిధుల సమావేశంలో వెల్లడించారు. తెలంగాణ, సమైక్యాంధ్ర ఉద్యమ నేపథ్యంలో నమోదైన 8047 మందిపై పెట్టిన 1667 కేసులను ఎత్తేస్తున్నట్లు ఆమె తెలిపారు.

తీవ్రమైన కేసులపై కోర్టులకు నివేదించి ఎత్తేస్తామని ఆమె చెప్పారు. రాష్ట్రంలో వ్రశాంత వాతావరణం ఏర్పడాలనే ఉద్దేశంతో విద్యార్థుల భవిష్యత్తును దృష్టిలో పెట్టుకుని కేసుల ఎత్తివేతకు ప్రభుత్వం నిర్ణయం తీసుకుందని ఆమె చెప్పారు. కేసుల ఎత్తివేతకు ప్రభుత్వం నిర్ణయం తీసుకున్నందున వెంటనే దీక్ష విరమించాలని ఆమె కాంగ్రెసు తెలంగాణ ప్రాంత పార్లమెంటు సభ్యులను కోరారు.