తెలంగాణ కోసం త్యాగాలు చేయడానికి సిద్ధం: కె కేశవరావు

హైదరాబాద్: తెలంగాణపై నా చిత్తశుద్ధిని ఎవరూ శంకించాల్సిన అవసరం లేదని కాంగ్రెసు పార్టీ సీనియర్ నాయకుడు కె కేశవరావు సోమవారం అన్నారు. మంగళవారం జరగనున్న తెలంగాణ కాంగ్రెసు నేతల భేటీ యధావిధిగా జరుగుతుందని ఆయన ప్రకటించారు. రాజీనామా చేయాల్సి వస్తుందని భేటీని రద్దు చేయమని కొందరు కోరినట్టు వచ్చిన వార్తలలో నిజం లేదన్నారు. తెలంగాణకు చెందిన కాంగ్రెసు పార్టీ నేతలంతా ఒకేత్రాటిపైన ఉన్నారన్నారు. అందరూ తెలంగాణ కోసం ఏకమయ్యారన్నారు. తెలంగాణ కోసం త్యాగాలు చేయడానికి తాము సిద్ధంగా ఉన్నామని, తెలంగాణ పట్ల తమ చిత్తశుద్ధిని శంకించాల్సిన అవసరం లేదని ఆయన అన్నారు.

శ్రీకృష్ణ కమిటీ నివేదికతో తమకు సంబంధం లేదని తెలంగాణ ప్రత్యేక రాష్ట్రమే తమ లక్ష్యమన్నారు. అదీ హైదరాబాదుతో కూడిన తెలంగాణ కావాలని కెకె అన్నారు. మంగళవారం జరిగే తెలంగాణ కాంగ్రెసు నేతల భేటీలో భవిష్యత్తు కార్యాచరణపై మాట్లాడుతామన్నారపు. రేపటి సమావేశంలో అందరూ పాల్గొంటారని చెప్పారు. సీమాంధ్రకు చెందిన నేతలు సెక్యూరిటీపై, తమ ప్రాపర్టీస్‌ పైన అనుమానం వ్యక్తం చేస్తున్నారన్నారు. వారిని మేం ఒప్పిస్తామన్నారు. వారి సెక్టూరిటీకి ఎలాంటి సమస్య లేదన్నారు. తెలంగాణకు ముందు ఎలా ఉన్నారో, తెలంగాణ వచ్చిన తర్వాత కూడా అంతే స్వేచ్ఛ వారికి ఉంటుందని చెప్పారు. వారు మా తమ్ముళ్లలాంటి వారన్నారు. కాగా సమావేశం సికింద్రాబాదులోని కెజెఆర్ గార్డెన్సులో జరగనున్నట్టు తెలుస్తోంది.