వంశీ పిటిషన్: బెజవాడ మాజీ సిపి పిఎస్సార్, డిజిపిలకు హైకోర్టు నోటీసులు

విజయవాడ: తనకు ప్రాణహాని ఉందంటూ బెజవాడ తెలుగుదేశం పార్టీ సీనియర్ నాయకుడు వల్లభనేని వంశీ వేసిన పిటిషన్‌కు రాష్ట్ర అత్యున్నత న్యాయస్థానం హైకోర్టు స్పందించింది. తనకు డిజిపి అరవిందరావు, విజయవాడ మాజీ పోలీసు కమిషనర్ నుండి ప్రాణహాని ఉందని, వారు తనకు సెక్యూరిటీని సైతం తగ్గించారని వంశీ వేసిన పిటిషన్‌ను హైకోర్టు పరిశీలించింది. బుధవారం డిజిపి అరవిందరావుకు, సీతారామాంజనేయులుకు నోటీసులు పంపించింది.

తనకు 2 ప్లస్ 2 సెక్యూరిటీని ఏర్పాటు చేయవలసి ఉండగా డిజిపి, మాజీ సిపిలు కలిసి 1 ప్లస్ 1 ప్రొటక్షన్‌ను కల్పించారని వంశీ అందులో ఆరోపించారు. దానిపై తాను హైకోర్టుకు కూడా వెళ్లానని అయితే అక్కడ తీర్పు తనకు అనుకూలంగా వచ్చిందన్నారు. అయినప్పటికీ సిపి, డిజిపితో కలిసి తనకు 1 ప్లస్ 1 ప్రొటక్షన్‌నే ఏర్పాటు చేశారని ఆయన పేర్కొన్నారు. తాను కోర్టుకు వెళ్లడం వల్ల వారు తనపై ఆగ్రహంతో ఉన్నారని ఆయన ఇంతకుముందు చెప్పారు.