కిరణ్ కుమార్ రెడ్డితో వీర తెలంగాణవాది కె. కేశవ రావు భేటీ

హైదరాబాద్‌: వీర తెలంగాణవాది కాంగ్రెసు పార్లమెంటు సభ్యుడు కె. కేశవరావు ముఖ్యమంత్రి కిరణ్ కుమార్ రెడ్డితో సమావేశమయ్యారు. ముఖ్యమంత్రి కిరణ్ కుమార్ రెడ్డి శనివారం కేశవరావును విందుకు ఆహ్వానించారు. ఈ విందు సమావేశం కాంగ్రెసు పార్టీ అధిష్టానం సూచనల మేరకే జరిగినట్లు సమాచారం. తెలంగాణ కోసం తీవ్ర స్వరంతో మాట్లాడుతున్న తెలంగాణ పార్టీ నాయకులకు నచ్చజెప్పేందుకు చేస్తున్న ప్రయత్నంలో భాగంగా ఈ భేటీ జరిగినట్లు చెబుతున్నారు. తెలంగాణపై వెనక్కి తగ్గాలని కిరణ్ కుమార్ రెడ్డి కేశవరావుకు సూచించినట్లు తెలుస్తోంది.

కిరణ్ కుమార్ రెడ్డి మాటలకు కేశవరావు తగ్గలేదని సమాచారం. దీంతో కేశవరావు కోపంగానే అక్కడి నుంచి వెళ్లిపోయారా అనే సందేహం కలుగుతోంది. కేశవరావు అక్కడి నుంచి మీడియా ప్రతినిధులతో మాట్లాడకుండానే వెళ్లిపోయారు. తెలంగాణ ప్రాంత శాసనసభ్యుడు ఆర్. దామోదర్ రెడ్డి శుక్రవారం సాయంత్రం కిరణ్ కుమార్ రెడ్డిని కలిశారు. తన సోదురుడు, మంత్రి ఆర్. వెంకటరెడ్డితో కలిసి ఆయన ముఖ్యమంత్రి వద్దకు వచ్చారు. తెలంగాణపై దామోదర్ రెడ్డి కూడా గొంతు పెంచుతున్న విషయం తెలిసిందే. తాను తెలంగాణ గురించే కిరణ్ కుమార్ రెడ్డితో మాట్లాడినట్లు దామోదర్ రెడ్డి చెప్పారు. పార్టీలోని వీర తెలంగాణవాదులతో కిరణ్ కుమార్ రెడ్డి విడివిడిగా మాట్లాడి వారిని బుజ్జగించే ప్రయత్నాలు సాగిస్తున్నట్లు తెలుస్తోంది.