ప్రణబ్ ముఖర్జీతో భేటీ కావాలని సీమాంధ్ర పార్లమెంటు సభ్యుల నిర్ణయం

న్యూఢిల్లీ: కేంద్ర మంత్రి ప్రణబ్ ముఖర్జీ శ్రీకృష్ణ కమిటీ నివేదికపై ఏర్పాటు చేసిన సమావేశానికి హాజరు కావాలని కాంగ్రెసు పార్లమెంటు సభ్యులు నిర్ణయం తీసుకున్నారు. ఏలూరు పార్లమెంటు సభ్యుడు కావూరి సాంబశివరావు నివాసంలో సీమాంధ్ర పార్లమెంటు సభ్యులు గురువారం సమావేశమై ఈ మేరకు నిర్ణయం తీసుకున్నారు. కేంద్ర మంత్రివర్గంలో చోటు దక్కనందుకు నిరసనగా ప్రణబ్ ముఖర్జీతో కలవడానికి కావూరి సాంబశివ రావు నిరాకరించారు. గుంటూరు పార్లమెంటు సభ్యుడు రాయపాటి సాంబశివ రావు కూడా కావూరి మాట మీదే నిలబడ్డారు. అయితే, మంత్రి పదవులపై అసంతృప్తితో సమావేశానికి హాజరు కాకపోవడం సరి కాదని కనుమూరి బాపిరాజు వంటి ఇతర సీమాంధ్ర పార్లమెంటు సభ్యులు వాదించారు.

సీమాంధ్ర ఎంపిల్లో కొంత మంది సర్ది చెప్పడంతో కావూరి సాంబశివ రావు ప్రణబ్ ముఖర్జీతో సమావేశానికి హాజరు కావాలని నిర్ణయం తీసుకున్నట్లు తెలుస్తోంది. అయితే, ఎంపీల సమావేశం మధ్యలోనే రాయపాటి సాంబశివ రావు వెళ్లిపోయారు. తాము ప్రణబ్ ముఖర్జీతో భేటీకి హాజరవుతామని ఆయన చెప్పారు. కాగా, శ్రీకృష్ణ కమిటీ నివేదికపై కాంగ్రెసు సీమాంధ్ర పార్లమెంటు సభ్యులు పార్టీ అధ్యక్షురాలు సోనియా గాంధీకి ఓ లేఖ రాశారు. శ్రీకృష్ణ కమిటీ నివేదికలోని ఆరు సిఫార్సులు కూడా బాగున్నాయని వారు సోనియాకు రాసిన లేఖలో చెప్పారు. అయితే, నివేదికలోని ఆరో ప్రత్యామ్నాయానికి కట్టుబడి పనిచేయాలని ప్రణబ్‌ను కోరాలని కాంగ్రెసు సీమాంధ్ర పార్లమెంటు సభ్యులు సమావేశంలో నిర్ణయం తీసుకున్నారు.