దమ్ముంటే ప్రభుత్వాన్ని పడగొట్టండి: జగన్ వర్గానికి విహెచ్ సవాల్

హైదరాబాద్: కాంగ్రెసు పార్టీనుండి బయటకు వెళ్లిపోయిన మాజీ పార్లమెంటు సభ్యుడు వైయస్ జగన్మోహన్ రెడ్డి మళ్లీ కాంగ్రెసు పార్టీలోకి రావడానికి ప్రయత్నాలు చేస్తున్నారనే వాదనలు వినిపిస్తున్నాయని రాజ్యసభ సభ్యుడు వి హనుమంతరావు గురువారం అన్నారు. కాంగ్రెసు‌లోకి రావడానికి మధ్యవర్తుల ద్వారా జగన్ తన ప్రయత్నాలు చేస్తున్నట్టుగా తెలుస్తోందన్నారు. తనకు బలం లేదని తెలుసుకునే కాంగ్రెసు‌వైపు చూస్తున్నాడన్నారు. సాక్షి అక్రమాలను ప్రజలు తీక్షణంగా గమనిస్తున్నారని చెప్పారు.

సాక్షి పెట్టబడులపై అందరికీ అనుమానాలున్నాయని అన్నారు. సాక్షి పత్రిక కాంగ్రెసు పార్టీని నిర్వీర్యం చేసే విధంగానూ, భారతీయ జనతా పార్టీని ఫోకస్ చేస్తూ కథనాలు ప్రచురిస్తుందని అన్నారు. విశ్వాసం నిరూపించుకోవాలని డిమాండ్ చేస్తున్న జగన్ వర్గం వారు దమ్ముంటే వెంటనే అవిశ్వాస తీర్మానం పెట్టి ప్రభుత్వాన్ని పడగొట్టాలని సవాల్ చేశారు. కాగా సీఎల్పీ కార్యాలయంలో సాక్షి జర్నలిస్టులకు, విహెచ్‌కు మధ్య మరోసారి తీవ్ర వాగ్వాదం జరిగింది.