జగన్ వర్గం రేఖ దాటారు, చర్యలుంటాయి: క్రమశిక్షణా కమిటీ చైర్మన్ కంతేటి

ఏలూరు: మాజీ పార్లమెంటు సభ్యుడు వైయస్ జగన్మోహన్ రెడ్డి వెంట వెళుతున్న ఎమ్మెల్యేలపై చర్యలు ఉంటాయని ప్రదేశ్ కాంగ్రెసు కమిటీ క్రమశిక్షణా సంఘం చైర్మన్ కంతేటి సత్యనారాయణ గురువారం పశ్చిమ గోదావరి జిల్లాలో విలేకరుల సమావేశంలో అన్నారు. కాంగ్రెసు పార్టీలోనే ఉంటూ పార్టీకి నష్టం చేసే వ్యాఖ్యలను, నష్టం చేసే చర్యలను చేస్తే పార్టీ చూస్తూ ఊరుకోదన్నారు. జగన్ వర్గం అయినా, కాంగ్రెసు సీనియర్ నాయకుడు వెంకటస్వామి అయినా పార్టీ చర్యలు తీసుకుంటుందన్నారు. వారిపై పూర్తి నివేదిక అందిన తర్వాత పరిశీలించి చర్యలు తీసుకోవడం ఉంటుందన్నారు.

సీనియర్ నేత వెంకటస్వామి కాంగ్రెసు పార్టీ అధ్యక్షురాలిపై తీవ్ర వ్యాఖ్యలు చేశారు. ఆయన వ్యాఖ్యలను కంతేటి తప్పు పట్టారు. వెంకటస్వామిపై చర్యల అంశాన్ని అధిష్టానంతో చర్చిస్తామనని తెలిపారు. జగన్ వర్గం ఎమ్మెల్యేలు కొందరు జగన్‌తో పాటు లక్ష్యదీక్ష, జలదీక్ష, జనదీక్షలో పాల్గొన్న విషయం తెలిసిందే. ఇప్పటికే మాజీమంత్రి కొండాసురేఖ, టిడిపి రెబెల్ ఎమ్మెల్యే నల్లపురెడ్డి ప్రసన్నకుమార్ రెడ్డిపై వేటుకు స్పీకరు సిద్ధమైనట్టు కథనాలు వచ్చాయి.