చిరంజీవిపై సుప్రీంకోర్టుకు వెళతా: పార్టీ వ్యవస్థాపకుడు చెన్నకృష్ణయ్య

కడప: ప్రజారాజ్యం పార్టీ అధ్యక్షుడు, తిరుపతి శాసనసభ్యుడు చిరంజీవి ఆయన పార్టీకి వేసిన ఓటర్ల నమ్మకాన్ని వమ్ము చేశారని ఈ విషయంపై తాను సుప్రీం కోర్టులో పిటిషన్ వేస్తానని కడప జిల్లాకు చెందిన ప్రజారాజ్యం పార్టీ వ్యవస్థాపకుడు చెన్నకృష్ణయ్య ఓ టీవి కార్యక్రమంలో ఆదివారం చెప్పారు. ప్రజారాజ్యం పార్టీ పేరు ఎన్నికల సంఘం వద్ద తాను దరఖాస్తు చేసుకొని పొందానని చెప్పినట్లుగా తెలుస్తోంది. అయితే చిరంజీవి మూడేళ్ల క్రితం ఆ పేరును తనకు ఇవ్వాల్సిందిగా కోరారని చెప్పారు.

ప్రజారాజ్యం పార్టీ సిద్ధాంతం సామాజిక న్యాయం అని ఆ రోజు తనకు చెప్పారని అందుకే తాను ప్రజారాజ్యంను చిరంజీవికి ఇచ్చానని చెప్పారు. గత సాధారణ ఎన్నికల్లో ప్రజారాజ్యం పార్టకి సుమారు 70 లక్షల మంది ఓట్లు వేశారని, రాష్ట్రంలో 15కి పైగా శాతం ఓట్లు వచ్చాయని చెప్పారు. అయితే ఇప్పుడు అనూహ్యంగా చిరంజీవి కాంగ్రెస్ పార్టీలో విలీనం అయితే పీఆర్పీకి వేసిన 70 లక్షల మంది ఓటర్లను అన్యాయం చేసినట్టేనని చెప్పారు. తన ఓటర్ల నమ్మకాన్ని వమ్ము చేసిన కారణంగా చిరంజీవిపై పీఆర్పీ వ్యవస్థాపకుడిగా సుప్రీంకోర్టుకు వెళతానని చెన్నకృష్ణయ్య చెప్పారు.