పార్టీ అధ్యక్ష పదవికి ముబారక్ రాజీనామా: గద్దె దిగడానికి ససేమీరా

కైరో: రెండు దశాబ్దాలకు పైగా ఈజిప్టును నిరంకుశంగా ఏలుతున్న ఆ పార్టీ అధ్యక్షుడు హోస్నీ ముబారక్ గద్దె దిగడానికి ససేమిరా అంటున్నారు. అయితే ముబారక్ తన నేషనల్ డెమక్రటిక్ పార్టీకి అధ్యక్షుడిగా రాజీనామా చేశారు. ముబారక్ కొడుకు గామల్ సైతం తన ఉన్నతాధికార ప్రతినిధి పదవికి రాజీనామా చేశారు. పార్టీ కార్యవర్గ సభ్యులు మొత్తం రాజీనామా చేశారు. తనకు ఇంకా పదవీ కాలం ఇంకా కొంత కాలం ఉందని, అప్పటి వరకు ఉంటానని చెప్పారు. అయితే పార్టీ అధ్యక్ష పదవికి రాజీనామా చేసిన ఆయన ఈజిప్టు అధ్యక్ష పదవిని మాత్రం వదులుకోవడానికి ఇష్ట పడటం లేదు. దీంతో ఈజిప్టులో ప్రజలు ఆగ్రహం వ్యక్తం చేస్తున్నారు.

కాగా ఈజిప్టులో శాంతియుత మార్పు ప్రక్రియ వెంటనే ప్రారంభం కావాల్సిన అవసరాన్ని వక్కాణిస్తూ ఆ దేశంలో నెలకొన్న పరిస్థితులపై చర్చించేందుకు ప్రపంచ నేతలకు అమెరికా అధ్యక్షుడు ఒబామా పిలుపునిచ్చారు. యునైటెడ్‌ అరబ్‌ ఎమిరేట్స్‌ యువరాజు మహమ్మద్‌ బిన్‌ జాయెద్‌, బ్రిటన్‌ ప్రధాని డేవిడ్‌ కెమరూన్‌, జర్మనీ ఛాన్సలర్‌ ఏంజెలా మార్కెల్‌తో ఒబామా మాట్లాడినట్టుగా తెలుస్తోంది. ఆందోళనకారులు కొందరిని లక్ష్యంగా చేసుకోవడాన్ని ఆయన ఖండించినట్టుగా తెలుస్తోంది. కాగా కైరోలోని సినై వద్ద గ్యాస్ పైప్ లైన్ పేలింది. ఇది ఆందోళనకారుల పనిగా భావిస్తున్నారు.