చిరంజీవి తెలంగాణలోనే కాదు సీమాంధ్రలోనూ పొడిచేసేదేమీ లేదు: కోమటిరెడ్డి

By Pratap

Published: Saturday, February 12, 2011, 14:00 [IST]

నల్లగొండ: ప్రజారాజ్యం పార్టీ అధ్యక్షుడు చిరంజీవి రాకతో కాంగ్రెసు కలిగే ప్రయోజనం తక్కువేనని రాష్ట్ర మంత్రి కోమటిరెడ్డి వెంకట రెడ్డి అభిప్రాయపడ్డారు. చిరంజీవి వల్ల కాంగ్రెసుకు తెలంగాణలో ఏ మాత్రం ప్రయోజనం ఉండదని, సీమాంధ్రలో కూడా ప్రయోజనం అంతంత మాత్రమేనని ఆయన శనివారం మీడియా ప్రతినిధులతో అన్నారు. అయితే, చిరంజీవి కాంగ్రెసులో చేరడాన్ని తాము స్వాగతిస్తున్నామని ఆయన అన్నారు. కాంగ్రెసు పార్టీలో ప్రజారాజ్యం పార్టీ విలీనం మంచి పరిణామమని ఆయన అన్నారు.

దివంగత వైయస్ రాజశేఖర రెడ్డిపై చిరంజీవి ఆరోపణలు చేయడంపై ఆయన తీవ్రంగా మండిపడ్డారు. వైయస్సార్ హయాంలో అవినీతి జరిగిందని చిరంజీవి విమర్శించడాన్ని ఆయన తప్పు పట్టారు. చిరంజీవి తన వ్యాఖ్యలను వెనక్కి తీసుకుని క్షమాపణ చెప్పాలని ఆయన డిమాండ్ చేశారు. వైయస్సార్‌పై విమర్శలు చేస్తే సహించబోమని ఆయన చిరంజీవిని హెచ్చరించారు. రచ్చబండ కార్యక్రమంలో తాము వైయస్సార్ ఫొటో పెట్టుకుంటున్నామని, ఇటువంటి స్థితిలో చిరంజీవి విమర్శలు సరైనవి కావని ఆయన అన్నారు. మంచి నాయకుడిని కోల్పోయామని తమ కాంగ్రెసు పార్టీ అధ్యక్షురాలు సోనియా గాంధీ వైయస్సార్ మరణించినప్పుడు అన్నారని ఆయన గుర్తు చేశారు.

Published On February 12, 2011