తెరాసపై శివాలెత్తిన కాంగ్రెసు సీమాంధ్ర పార్లమెంటు సభ్యుడు కావూరి

హైదరాబాద్: లోకసత్తా అధ్యక్షుడు జయప్రకాష్ నారాయణపై దాడి చేసిన తెలంగాణ రాష్ట్ర సమితి (తెరాస) శాసనసభ్యులపై కాంగ్రెసు సీమాంధ్ర పార్లమెంటు సభ్యుడు కావూరి సాంబశివరావు శివాలెత్తారు. తెరాస శాసనసభ్యుల తీరుపై తీవ్రంగా మండిపడ్డారు. జెపిపై దాడిని ఆయన హేయమైన చర్యగా అభివర్ణించారు. విజ్ఞత, మానవత్వం ఉన్న ప్రజాప్రతినిధులు చేసే పని కాదని ఆయన గురువారం మీడియా ప్రతినిధుల సమావేశంలో వ్యాఖ్యానించారు. రాజకీయ నాయకులు మాటా మాటా అనుకోవడం, వాదులాటకు దిగడం మామూలే కానీ ఇటువంటి సంఘటన చోటు చేసుకోలేదని ఆయన అన్నారు. తెలంగాణను వ్యతిరేకించేవాళ్లంతా ద్రోహులేనా ఆని అడిగారు.

జెపినో, తానో తెలంగాణ ఇచ్చేవారం కాదని ఆయన అన్నారు. తమ అభిప్రాయాలను తాము చెబుతున్నారని, వారి అభిప్రాయాలు వారు చెబుతున్నారని, వారిని తాము ఏనాడు తప్పు పట్టలేదని, వారిని నిందించలేదని ఆయన అన్నారు. ఈ విషయంపై జర్నలిస్టులు కూడా ఆలోచించాలని ఆయన సూచించారు. ఐదు వందల రాష్ట్రాలు ఇవ్వమనండి తమకేమీ అభ్యంతరం లేదని ఆయన అన్నారు. శాస్త్రీయ పద్ధతిలో దేశంలో ఐదు వందల రాష్ట్రాలు ఇచ్చినా తమకు అభ్యంతరం లేదని ఆయన వ్యాఖ్యానించారు. రేపు హైదరాబాద్ రాష్ట్రం కావాలని ఎవరైనా అడిగితే దాన్ని వ్యతిరేకించేవారు ద్రోహులవుతారా అని ఆయన అడిగారు.

తెలుగు మ్యాట్రిమోనిలో మీకు నచ్చిన జీవిత భాగస్వామి ఎంపికలు - రిజిస్ట్రేషన్ ఉచితం!