తెలంగాణ నినాదాలు: టిఆర్ఎస్, బిజెపి ఎమ్మెల్యేల సస్పెన్షన్

By Srinivas

Published: Wednesday, February 23, 2011, 12:04 [IST]

హైదరాబాద్: తెలంగాణ రాష్ట్ర సమితి పార్టీకి చెందిన శాసనసభ్యులను డిప్యూటీ స్పీకర్ నాదెండ్ల మనోహర్ బుధవారం సస్పెండ్ చేశారు. ఆర్థిక శాఖామంత్రి ఆనం రామనారాయణ రెడ్డి బడ్జెట్‌ను సమర్పిస్తున్న సమయంలో టిఆర్ఎస్‌కు చెందిన ఎమ్మెల్యేలు జై తెలంగాణ నినాదాలు చేయడంతో సభలో తీవ్ర ఉద్రిక్తత నెలకొంది. దీంతో నాదెండ్ల మనోహర్ టిఆర్ఎస్ శాసనసభ్యులను అసెంబ్లీ నుండి ఒక్కరోజు సస్పెండ్ చేశారు. తెలంగాణ రాష్ట్ర సమితికి చెందిన కొప్పుల ఈశ్వర్ రెడ్డి, కె తారకరామారావు, వినయ భాస్కర్, ఓదేలు, అరవింద్ రెడ్డిని ఒక్కరోజు పాటు సభనుండి సస్పెండ్ చేశారు.

టిఆర్ఎస్ ఎమ్మెల్యేల సస్పెన్షన్ అనంతరం పలువురు తెలంగాణకు చెందిన టిడిపి, సిపిఐ, భారతీయ జనతా పార్టీ శాసనసభ్యులు జై తెలంగాణ నినాదాలు చేశారు. దీంతో చంద్రవతి, మల్లేష్, సాంబశివరావు, భారతీయ జనతా పార్టీకి చెందిన లక్ష్మీనారాయణలను కూడా టిఆర్ఎస్ ఎమ్మెల్యేలను సస్పెండ్ చేసిన కొద్ది సేపటికే సస్పెండ్ చేశారు. కాగా గవర్నర్ నరసింహన్ ప్రసంగాన్ని అడ్డుకున్న హరీష్ రావుతో పాటు మరో ఇద్దరు టిఆర్ఎస్ ఎమ్మెల్యేలు, తెలుగుదేశం పార్టీకి చెందిన ఎనుముల రేవంత్ రెడ్డి, మహేందర్ రెడ్డిని శుక్రవారం సస్పెండ్ చేశారు.

Published On February 23, 2011