కేంద్ర నిర్ణయం తెలంగాణకు వ్యతిరేకమైతే 24 గంటల్లో రాజీనామా: నాగం

By Srinivas

Published: Sunday, March 6, 2011, 16:04 [IST]

హైదరాబాద్: కేంద్ర ప్రభుత్వం ప్రత్యేక తెలంగాణ రాష్ట్రానికి వ్యతిరేకంగా నిర్ణయం తీసుకుంటే తెలంగాణలోని ప్రజా ప్రతినిధులంతా 24 గంటల్లో రాజీనామాలు చేస్తారని తెలుగుదేశం పార్టీ సీనియర్ శాసనసభ్యుడు, టిడిపి తెలంగాణ ఫోరం కన్వీనర్ నాగం జనార్ధన్ రెడ్డి ఆదివారం హైదరాబాద్‌లోని ఇందిరాపార్క్ వద్ద జరిగిన రైతుల మహాదీక్షలో అన్నారు. తెలంగాణకోసం ఇక ఇదే ఆఖరి పోరాటం అని హెచ్చరించారు. తెలంగాణ కోసం జరుగుతున్న పోరాటంలో ఎవరు వ్యతిరేకమైనా ప్రజలు క్షమించరన్నారు. వారిని ద్రోహులుగా గుర్తిస్తారని చెప్పారు. సీమాంధ్ర ప్రజా ప్రతినిధులు తెలంగాణ వనరులు పూర్తిగా దోచుకుంటున్నామని ఆరోపించారు.

తెలంగాణ ప్రజా ప్రతినిధులు రాజీనామా చేసి కేంద్రంపై ఒత్తిడి తెస్తెనే తెలంగాణ వస్తుందని తెలంగాణ రాష్ట్ర సమితి నేత జగదీశ్వర్ రెడ్డి అన్నారు. జాతీ మొత్తం ఏకమై పోరాడాల్సిన ఆవశ్యకత ఉందని ఆయన అభిప్రాయం వెలిబుచ్చారు. ఉద్యమ ప్రాధాన్యత తెలుసుకొని తెలంగాణ ప్రజా ప్రతినిధులు అంతా పోరాడాలని చెప్పారు. రాష్ట్ర గవర్నర్ నరసింహన్ తెలంగాణపై కేంద్రానికి తప్పుడు సంకేతాలు అందించి తెలంగాణకు అడ్డుపడుతున్నారని ఎంపీ వివేకా అన్నారు. గవర్నర్‌ను కేంద్రం వెంటనే వెనక్కి పిలవాలని కోరారు. కేంద్రం తెలంగాణ ప్రకటించకుంటే రాజీనామాలకు సిద్ధమని చెప్పారు. తెలంగాణ కొట్లాడితే తప్పకుండా వస్తుందని భారతీయ జనతా పార్టీ మాజీ అధ్యక్షుడు బండారు దత్తాత్రేయ అన్నారు. వెంటనే పార్లమెంటులో తెలంగాణ బిల్లు పెట్టాలని డిమాండ్ చేశారు.

Published On March 6, 2011