హసన్ అలీ కేసులో ఎన్‌ఫోర్స్‌మెంట్ డైరెక్టరేట్‌కు చుక్కెదురు

ముంబై: మనీలాండరింగ్ కేసులో హసన్ అలీ ఖాన్ విషయంలో ఎన్‌ఫోర్స్‌మెంట్ (ఇడి)కి చుక్కెదురైంది. హసన్ అలీ ఖాన్‌ను తమ కస్టడీలోకి తీసుకుని విచారించడానికి అనుమతించాలని ఇడి చేసిన విజ్ఢప్తిని స్థానిక కోర్టు తిరస్కరించింది. హసన్ అలీకి బెయిల్ మంజూరు చేసింది. దీంతో అతను హాయిగా వెళ్లిపోయాడు. ఖాన్ నేరం చేశాడని నిరూపించడానికి అవసరమైన సాక్ష్యాలను ఇడి చూపించలేకపోయిందని ప్రిన్సిపల్ సెషన్స్ కోర్టు న్యాయమూర్తి ఎంఎల్ తహిల్యానీ అభిప్రాయపడ్డారు.

కొన్ని షరతులపై కోర్టు హసన్ అలీ ఖాన్‌కు బెయిల్ మంజూరు చేసింది. ఐదు రోజుల పాటు ముంబైని వదిలి వెళ్లకూడదని, ప్రతి రోజూ ఇడి అధికారుల ముందు హాజరు కావాలని షరతులు పెట్టింది. స్థానిక కోర్టు ఆదేశాలను పై కోర్టులో సవాల్ చేస్తామని ఇడి అధికారులు చెప్పారు. హసన్ అలీ ఖాన్ 8 బిలియన్ అమెరికా డాలర్లకు పైగా స్విట్జర్లాండ్‌లోని యుబిఎస్ బ్యాంకుకు అక్రమంగా తరలించినట్లు, ఇతర అక్రమ లావాదేవీలకు పాల్పడినట్లు ఆరోపణలున్నాయి.

English summary

In a huge embarrassment for the Enforcement Directorate, a local court today rejected its plea seeking remand of Hasan Ali Khan for his custodial interrogation in a money laundering case and granted bail to the controversial businessman.