మూడో రోజుకు చేరిన సిపిఎం నాయకుడు రాఘవులు దీక్ష

By Pratap

Published: Saturday, March 19, 2011, 11:27 [IST]

హైదరాబాద్: సిపిఎం రాష్ట్ర కార్యదర్శి బివి రాఘవులు చేపట్టిన నిరవధిక దీక్ష శనివారం మూడో రోజుకు చేరింది. ఆయన తన దీక్షను విరమించడానికి నిరాకరిస్తున్నారు. ప్రజా సమస్యలను పరిష్కరించాలని డిమాండ్ చేస్తూ రాఘవులు మూడు రోజుల క్రితం దీక్షను ప్రారంభించారు. హైదరాబాదులోని ఇందిరా పార్కు వద్ద దీక్ష చేస్తున్న రాఘవులును తెలుగుదేశం నాయకులు ఎర్రంనాయుడు, కంభంపాటి రామ్మోహన్ రావు తదిరులు పరామర్శించారు. తాను దీక్షను విరమించేది లేదని రాఘవులు అన్నారు.

ప్రజలు తీవ్రమైన ఇబ్బందులు పడుతున్నారని ఆయన అన్నారు. సమస్యలు పరిష్కరిస్తే తమ పార్టీకి ప్రతిష్ట పెరుగుతుందని ప్రభుత్వం భావిస్తూ ఉండవచ్చునని ఆయన అన్నారు. సమస్యలను పరిష్కరించే వరకు దీక్ష కొనసాగుతుందని, వివిధ రూపాల్లో ఆందోళనలు చేస్తామని ఆయన చెప్పారు. కిరణ్ కుమార్ రెడ్డి ముఖ్యమంత్రిగా వ్యవహరించడం లేదని రాఘవులును పరామర్శించిన తెలుగుదేశం పార్టీ నాయకుడు కె. ఎర్రంనాయుడు విమర్శించారు. సమస్యలను పరిష్కరించకుండా ప్రభుత్వం వెర్రి చేష్టలు చేస్తోందని ఆయన అన్నారు.

Published On March 19, 2011