కృష్ణా జిల్లా నేతలు వల్లభనేని వంశీ, ఉమలపై చంద్రబాబు సీరియస్

హైదరాబాద్: అంతర్గత కుమ్ములాటలతో వీధికెక్కిన కృష్ణా జిల్లా పార్టీ నాయకులపై తెలుగుదేశం పార్టీ అధ్యక్షుడు నారా చంద్రబాబు నాయుడు సీరియస్ అయ్యారు. వారిపై ఆయన తీవ్ర ఆగ్రహం వ్యక్తం చేశారు. సింగపూర్ ప్రకటనలో ఉన్న ఆయన ఈ మేరకు శుక్రవారం ఓ ప్రకటన చేశారు. వ్యక్తిగత కారణాలతో అంతర్గత వ్యవహారాలపై మీడియాకు ఎక్కితే సహించేది లేదని ఆయన హెచ్చరించారు. పార్టీ క్రమశిక్షణను ఉల్లంఘిస్తే ఎంతటివారిపైన అయినా చర్యలు తీసుకుంటామని ఆయన అన్నారు. వ్యక్తిగత కారణాలతో పార్టీ ప్రతిష్టను దిగజార్చే ప్రయత్నం చేస్తే సహించబోమని ఆయన అన్నారు.

పార్టీ నాయకులు వ్యక్తిగత ఎజెండాలతో మీడియాకు ఎక్కితే పరిస్థితి తీవ్రంగా ఉంటుందని ఆయన అన్నారు. కృష్ణా జిల్లా పార్టీ నాయకులు వల్లభనేని వంశీ, దేవినేని ఉమా మహేశ్వర రావు తీవ్ర విభేదాలతో మీడియాకు ఎక్కిన విషయం తెలిసిందే. తనపై తీవ్ర విమర్శలు రావడంతో దేవినేని ఉమా మహేశ్వర రావు పార్టీ కృష్ణా జిల్లా అధ్యక్ష పదవికి రాజీనామా చేశారు. ఉమా మహేశ్వర రావు రాజీనామా చేసినందున తాను విజయవాడ నగర పార్టీ అధ్యక్ష పదవికి రాజీనామా చేయడం లేదని వల్లభనేని వంశీ చెప్పారు. తాను పార్టీ నాయకులకు, కార్యకర్తలకు అందుబాటులో ఉంటున్నానని, ఏమైనా సమస్యలు ఉంటే తన వద్ద కూర్చుని పరిష్కరించుకోవచ్చునని చంద్రబాబు చెప్పారు.

English summary

TDP president N Chandrababu Naidu expressed anguish at party Krishna district leaders. He warned party leaders action will be taken, if they make open statements on internal issues.