వెనక్కి తగ్గిన వల్లభనేని వంశీ, రాజీనామా ఉపసంహరణ

విజయవాడ: తన రాజీనామా విషయంలో తెలుగుదేశం పార్టీ విజయవాడ అర్బన్ అధ్యక్షుడు వల్లభనేని వంశీ వెనక్కి తగ్గారు. హైడ్రామా అనంతరం తాను రాజీనామాను ఉపసంహరించుకున్నట్లు వల్లభనేని వంశీ ప్రకటించారు. పార్టీ విజయవాడ అర్బన్ కార్యకర్తల సమావేశంలో సోమవారం ఉదయం తాను పార్టీ పదవికి రాజీనామా చేస్తున్నట్లు ప్రకటించారు. ఆ ప్రకటన చేసి సమావేశం నుంచి బయటకు వెళ్లడానికి ప్రయత్నించారు. అయితే, సమావేశం గది తలుపులకు కార్యకర్తలు తాళం వేసి బయటకు వెళ్లకుండా వంశీని అడ్డగించారు.

రాజీనామా చేయవద్దని కార్యకర్తలు పట్టుబట్టారు. దాదాపు అర గంట పాటు హైడ్రామా చోటు చేసుకుంది. రాజీనామా చేయవద్దని కృష్ణా జిల్లా నాయకులు గద్దె రామ్మోహన్ రావు, అనురాధ, కాట్రగడ్డ బాబు వంశీకి నచ్చజెప్పారు. తన తర్వాత వచ్చే పార్టీ అధ్యక్షుడికి తాను అన్ని విధాలా సహకరిస్తానని వంశీ హామీ ఇచ్చినా కార్యకర్తలు వినలేదు. తాను దేవినేని ఉమా మహేశ్వరరావు నాయకత్వంలో పని చేయలేనని, అందువల్లనే పార్టీ పదవి నుంచి తప్పుకుంటానని ఆయన కార్యకర్తలకు చెప్పారు.

English summary

Vallabhaneni Vamshi withdrew his resignation for TDP Vijayawada urban presidentship. As party workers appealed, Vamshi has withdrawn his resignation.