సిఎం కిరణ్ కుమార్ రెడ్డిపై గుర్రుమంటున్న ఎమ్మెల్యే విష్ణువర్ధన్ రెడ్డి

By Pratap

Published: Wednesday, May 11, 2011, 17:34 [IST]

హైదరాబాద్: ముఖ్యమంత్రి కిరణ్ కుమార్ రెడ్డి తీరుపై హైదరాబాదుకు చెందిన కాంగ్రెసు శాసనసభ్యుడు పి. విష్ణువర్ధన్ రెడ్డి తీవ్ర అసంతృప్తి వ్యక్తం చేస్తున్నారు. ఓ ప్రముఖ తెలుగు టీవీ చానెల్ ప్రతినిధి వద్ద ముఖ్యమంత్రి తీరుపై తీవ్ర ఆగ్రహం వ్యక్తం చేశారు. ముఖ్యమంత్రి శాసనసభ్యులను పట్టించుకోవడం లేదని, పూర్తిగా అధికారులపైనే ఆధారపడుతున్నారని ఆయన విమర్శించారు. ఈ విషయాన్ని తాను కాంగ్రెసు పార్టీ అధిష్టానం దృష్టికి తీసుకుని వెళ్తానని ఆయన చెప్పారు. రచ్చబండ పూర్తిగా విఫలమైందని ఆయన అన్నారు. రచ్చబండలో ప్రజలకు ఇచ్చిన హామీలు అమలు కావడం లేదని ఆయన అన్నారు.

తమకు ముఖ్యమంత్రి అపాయింట్‌మెంట్ కూడా లభించడం లేదని, శాసనసభ్యులు బలంగా ఉంటేనే పార్టీ బలంగా ఉంటుందని, ఈ విషయం ముఖ్యమంత్రికి పట్టడం లేదని ఆయన అన్నారు. వైయస్సార్ కాంగ్రెసు పార్టీ నేత వైయస్ జగన్ వర్గానికి చెందిన శాసనసభ్యులకు మాత్రమే ముఖ్యమంత్రి ప్రాధాన్యం ఇస్తున్నారని, కడప శాసనసభ్యులతో మాత్రమే మాట్లాడుతున్నారని, మిగతా జిల్లాల శాసనసభ్యులను పట్టించుకోవడం లేదని ఆయన అన్నారు.

Published On May 11, 2011