రాష్ట్రపతి పాలనకు నో చెప్పనున్న కేంద్రం: కర్నాటకపై వెనుకడుగు!

By Srinivas

Published: Monday, May 16, 2011, 14:23 [IST]

న్యూఢిల్లీ: కర్నాటకలో భారతీయ జనతా పార్టీ రాష్ట్ర ప్రభుత్వాన్ని తొలగించి రాష్ట్రపతి పాలన ప్రకటించాలని సిఫార్సు చేసిన ఆ రాష్ట్ర గవర్నర్ హెచ్ఆర్ భరద్వాజ్ నిర్ణయానికి కేంద్రం నో చెప్పనున్నట్టుగా తెలుస్తోంది. కర్నాటకలో రాష్ట్రపతి పాలన ప్రకటిస్తే బిజెపి లాభపడుతుందన్న భావనలో అధికార కాంగ్రెసు పార్టీ యోచిస్తున్నట్టుగా తెలుస్తోంది. కర్నాటకలో రాష్ట్రపతి పాలన విషయంపై చర్చించేందుకు మంత్రివర్గ సంఘం వేయాలని ప్రధాని మన్మోహన్ సింగ్ సూచించినట్లు కూడా తెలుస్తోంది. ఈ విషయాన్ని మంత్రివర్గ రాజకీయ ఎఫైర్ కమిటీలో చర్చించిన తర్వాత నిర్ణయం తీసుకోనున్నట్లుగా తెలుస్తోంది. కర్నాటకలో రాష్ట్రపతి పాలనపై తొందరపాటు నిర్ణయం తీసుకోమని, న్యాయ నిపుణుల సలహాల మేరకు నిర్ణయం తీసుకోనున్నట్లు కేంద్రం చెప్పినట్లుగా తెలుస్తోంది. బిజెపి లాభపడుతుందన్న అనుమానాల నేపథ్యంలో నిర్ణయం తర్వాత తీసుకుంటామని చెప్పినప్పటికీ రాష్ట్రపతి పాలన దిశలో చర్యలు చేపట్టే అవకాశం లేదని తెలుస్తోంది.

ఐదు రాష్ట్రాల ఎన్నికలలో బిజెపి ఏమాత్రం ప్రభావం చూపలేక పోయిందని, ఇప్పుడు బిజెపి ప్రభుత్వంపై చర్యలు తీసుకుంటే స్తబ్దగా ఉన్న ఆ పార్టీకి సానుభూతి వెల్లువెత్తుతుందని కేంద్రం భావిస్తున్నట్టుగా తెలుస్తోంది. రాష్ట్రపతి పాలన అకస్మాత్తుగా పెడితే ప్రభుత్వం కొనసాగకుండా చేసిందనే అపవాదును మూట కట్టుకోవాల్సి వస్తుందని వారు భావిస్తున్నారని సమాచారం. తద్వారా బిజెపి కర్నాటకలోనే కాకుండా జాతీయంగా లాభ పడుతుందని, వారికి ఆ అవకాశం ఇవ్వవద్దని కేంద్రం యోచిస్తున్నది. ప్రభుత్వ ఏర్పాటుకు యెడ్యూరప్పకు మరికొంత గడువు ఇవ్వాలని, అప్పటికీ ఆయన ఎమ్మెల్యేల బలం నిరూపించుకోలేక పోతే అప్పుడు చర్యలు తీసుకుంటే తమకు నష్టం ఉండదని కేంద్రం భావిస్తున్నట్టుగా తెలుస్తోంది.

యెడ్యూరప్ప బలం నిరూపించుకోకపోతే కాంగ్రెసు, జెడిఎస్‌లను ప్రభుత్వం ఏర్పాటు చేయాలని గవర్నర్ కోరే అవకాశం ఉంది. తమకు ఇప్పుడు ఆ అవకాశం లేదు. అలాంటప్పుడు నేరుగా ఎన్నికలకే వెళ్లవలసి ఉంటుంది. అప్పుడు బిజెపి మళ్లీ లాభపడటం ఖాయమని భావిస్తున్నారు. ఈ విషయంపై ప్రధాని, చిదంబరం, ప్రణబ్ ముఖర్జీ, ఎకె అంటోనీ, ఎస్ఎం కృష్ణ తదితరులు భేటీ అయ్యారు.

Published On May 16, 2011