ఎన్టీ రామారావుకు భారతరత్న ఇవ్వాలి: చంద్రబాబు నాయుడు డిమాండ్

హైదరాబాద్: స్వర్గీయ ఎన్టీ రామారావుకు భారతరత్న ఇవ్వాలని తెలుగుదేశం పార్టీ అధ్యక్షుడు నారా చంద్రబాబు నాయుడు కేంద్ర ప్రభుత్వాన్ని డిమాండ్ చేశారు. ఎన్టీఆర్ జయంతి సందర్భంగా ఆయన శనివారం మహానాడులో ఈ డిమాండ్ చేశారు. రైతుల కోసం ఎన్టీ రామారావు నిరంతరం తపించారని, ఇప్పుడు రైతులు తీవ్రమైన ఇబ్బందుల్లో ఉన్నారని, వారిని ఆదుకోవాల్సిన బాధ్యత తమపై ఉందని ఆయన అన్నారు. మహిళలకు మొట్టమొదట రిజర్వేషన్లు కల్పించిన ఘనత ఎన్టీఆర్‌దేనని ఆయన అన్నారు. వెనకబడిన తరగతుల కోసం ఎన్టీఆర్ నిరంతరం పోరాటం చేశారని ఆయన అన్నారు.

శంషాబాద్ అంతర్జాతీయ విమానాశ్రయానికి స్వర్గీయ ఎన్టీ రామారావు పెట్టాలని తాము డిమాండ్ చేసినా ప్రభుత్వం పట్టించుకోలేదని, దాని కోసం తాము పోరాటం చేస్తామని ఆయన చెప్పారు. ఎన్టీఆర్ స్ఫూర్తితో తాము ముందుకు సాగుతామని ఆయన చెప్పారు. తెలుగుజాతి అభివృద్ధి కోసం ఎన్టీ రామారావు శ్రమించారని, ఎన్టీఆర్ ఆశయాల సాధన కోసం తమ పార్టీ ముందుకు సాగుతుందని ఆయన చెప్పారు. పేద ప్రజల అభ్యున్నతికి ఎన్టీ రామారావు కృషి చేశారని ఆయన అన్నారు. పార్లమెంటు ఆవరణలో ఎన్టీ రామారావు విగ్రహ ప్రతిష్టాపనకు తాము పాటు పడుతామని ఆయన చెప్పారు.