హరికృష్ణకు షాక్: చంద్రబాబు వర్గం దేవినేనితో వల్లభనేని వంశీ చెట్టాపట్టాల్

By Srinivas

Published: Sunday, May 29, 2011, 11:47 [IST]

హైదరాబాద్: మూడు రోజుల మహానాడు కార్యక్రమంలో భాగంగా ముగింపు రోజైన ఆదివారం పలు ఆసక్తికర సంఘటనలు చోటు చేసుకుంటున్నాయి. ముగింపు రోజు రైతులను ఆకట్టుకోవడానికి ఆ పార్టీ అధ్యక్షుడు నారా చంద్రబాబునాయుడు అచ్చ తెలుగు వాడిగా పంచెకట్టుతో కనిపిస్తే అంతకు మించిన విశేష సంఘటన ఆ తర్వాత చోటు చేసుకుంది. గత కొన్నాళ్లుగా కృష్ణా జిల్లాలో విమర్శలు, ప్రతి విమర్శలు, సవాళ్లు, ప్రతి సవాళ్లు విసురుకున్న ఆ పార్టీ సీనియర్ ఎమ్మెల్యే, కృష్ణా జిల్లా పార్టీ అధ్యక్షుడు దేవినేని ఉమా మహేశ్వరరావు, జిల్లా అర్బన్ పార్టీ అధ్యక్షుడు వల్లభనేని వంశీమోహన్ మహానాడు చివరి రోజు పక్క పక్కనే కూర్చొని మాట్లాడుకున్నారు. కార్యక్రమంలో చెట్టాపట్టాల్ వేశారు.

మహానాడు కార్యక్రమంలో ఎడమొహం పెడమొహంగా ఉంటారని అందరూ ఊహించారు. అయితే అందుకు పూర్తి విరుద్దంగా వారిద్దరూ చెట్టా పట్టాల్ వేసుకున్నారు. దీంతో బెజవాడ పంచాయతీకి చెక్ పడినట్లయిందని పలువురు భావిస్తున్నారు. గత కొన్నాళ్లుగా రాజ్యసభ సభ్యుడు హరికృష్ణ వర్గం నేతగా వంశీ, చంద్రబాబునాయుడు వర్గం నేతగా దేవినేని జిల్లాలో మీడియా సాక్షిగా ఆరోపణలు చేసుకున్నారు. అయితే అనంతరం వారి మధ్య చంద్రబాబు సయోధ్య కుదిర్చినందునే వారిద్దరూ మహానాడులో కలిసి పోయి ఉన్నట్లుగా సమాచారం.

అంతేకాకుండా హరికృష్ణ వర్గం నేత అయిన వంశీ మహానాడు రెండో రోజు అలిగి వెళ్లి పోయిన తర్వాత బద్ద విరోధి అయిన దేవినేనితో చెట్టాపట్టాల్ వేయడం హరికృష్ణకు, జూనియర్ ఎన్టీఆర్‌కు మింగుడు పడని విషయమే. మొత్తానికి బాబు తన చాతుర్యంతో బెజవాడ రాజకీయ విభేదాల సమస్యను తీర్చినట్లుగానే కనిపిస్తోంది.

Published On May 29, 2011