నాగం ఒడ్డున పడ్డ చేప పిల్లలా కొట్టుకుంటున్నాడు: ఎర్రబెల్లి

By Srinivas

Published: Tuesday, May 31, 2011, 16:06 [IST]

హైదరాబాద్: పార్టీ నుండి బహిష్కరింపబడిన తర్వాత నాగర్‌కర్నూల్ శాసనసభ్యుడు నాగం జనార్దన్ రెడ్డి ఒడ్డున పడ్డ చేప పిల్లలా కొట్టుకుంటున్నారని తెలుగుదేశం పార్టీ సీనియర్ ఎమ్మెల్యే ఎర్రబెల్లి దయాకరరావు మంగళవారం అన్నారు. ఇప్పటికైనా నాగం జనార్దన్ రెడ్డి తెలుగుదేశం పార్టీ జెండా కింద తెలంగాణ ఉద్యమం చేయడానికి ముందుకు రావాలని డిమాండ్ చేశారు.

ఏఐసిసి అధికార ప్రతినిధి మనీష్ తివారి వ్యాఖ్యల ద్వారా తెలంగాణ అంశం కేంద్రం పరిధిలోనే ఉందని తేలిపోయిందన్నారు. రెండో ఎస్సార్సీకి తాము సిద్ధంగా లేమన్నారు. తెలంగాణపై రెండో ఎస్సార్సీ వేస్తే ఊరుకోమన్నారు. ఎస్సార్సీతో సంబంధం లేకుండా తెలంగాణ ప్రకటన చేయాలన్నారు.

Published On May 31, 2011