కోటి మందితో దీక్ష: సత్యాగ్రహపై వెనక్కి తగ్గని రామ్‌దేవ్ బాబా

By Srinivas

Published: Wednesday, June 1, 2011, 18:10 [IST]

న్యూఢిల్లీ: దేశంలో పేరుకు పోయిన అవినితీ, అక్రమాలు, విదేశాల్లో పోగై ఉన్న నల్లధనంపై తన దీక్ష కొనసాగుతుందని ప్రముఖ యోగాగురువు రాందేవ్ బాబు బుధవారం మరోసారి స్పష్టం చేశారు. ఆయన న్యూఢిల్లీలోని విమానాశ్రయంలో కేంద్ర మంత్రులతో చర్చలు జరిపారు. చర్చల అనంతరం ఆయన విలేకరులతో మాట్లాడారు. చర్చలు తనకు సంతృప్తిని ఇచ్చాయని బాబా అన్నారు. అయితే తన దీక్ష మాత్రం జూన్ 4న ప్రారంభమవుతుందన్నారు. సత్యాగ్రహ దీక్ష ప్రభుత్వంపైనో, ప్రత్యేకంగా ఓ పార్టీపైనో కాదన్నారు. కేవలం అవినీతి, నల్లడబ్బు పైనే దీక్ష అన్నారు. దీక్షపై వెనుకడుగు వేసేది లేదన్నారు.

తాను చేపట్టే దీక్షలో ప్రజలంతా భాగస్వాములే అన్నారు. నల్లధనం, అక్రమాలపై ప్రభుత్వంతో మరిన్ని చర్చలు జరుపుతానని అన్నారు. ఆర్థిక సమాజిక న్యాయం కోసం చేసే ఈ దీక్షలో ప్రజలంతా భాగస్వాములు కావాలని ఆయన కోరారు. కేంద్ర ప్రభుత్వంత తనకు ఎలాంటి విభేదాలు లేవన్నారు. ప్రధానిని, సుప్రీం కోర్టు ప్రధాన న్యాయమూర్తిని లోక్‌పాల్ పరిధిలోకి తేకూడదని తాను అనలేదని బాబా చెప్పారు.

Published On June 1, 2011