గవర్నర్ నరసింహన్‌తో ముఖ్యమంత్రి కిరణ్ కుమార్ రెడ్డి భేటీ

By Pratap

Published: Wednesday, June 1, 2011, 12:36 [IST]

హైదరాబాద్: ముఖ్యమంత్రి కిరణ్ కుమార్ రెడ్డి బుధవారంనాడు గవర్నర్ నరసింహన్‌తో సమావేశమయ్యారు. ఈ సమావేశం గంటకు పైగా సాగింది. రాష్ట్రంలోని తాజా రాజకీయ పరిణామాలపై వారిద్దరి మధ్య చర్చ జరిగిందని అంటున్నారు. మంత్రి జూపల్లి కృష్ణా రావు రాజీనామాపై కూడా వారిరువురి మధ్య చర్చ జరిగింది. జూపల్లి రాజీనామాపై ముఖ్యమంత్రి బుధవారం సాయంత్రంలోగా నిర్ణయం తీసుకుంటారని చెబుతున్నారు. తెలంగాణ రాష్ట్ర సాధన కోసం చేస్తున్న పోరాటంలో భాగంగా జూపల్లి కృష్ణా రావు మంత్రి పదవికి రాజీనామా చేస్తూ లేఖను గవర్నర్‌కు అందించారు.

తెలంగాణ అంశం కూడా వారిద్దరి మధ్య చర్చకు వచ్చినట్లు చెబుతున్నారు. మహబూబ్ నగర్ జిల్లా మంత్రులు డికె అరుణ, జూపల్లి కృష్ణారావు మధ్య చెలరేగిన వివాదాన్ని ముఖ్యమంత్రి గవర్నర్‌కు వివరించినట్లు చెబుతున్నారు. నిజానికి, కిరణ్ కుమార్ రెడ్డి మంగళవారం సాయంత్రమే గవర్నర్‌ను కలవాల్సి ఉంది. అయితే, ఆ అపాయింట్‌మెంటును ముఖ్యమంత్రి రద్దు చేసుకున్నారు. దీంతో బుధవారం గవర్నర్‌తో భేటీ అయ్యారు.

Published On June 1, 2011