మళ్లీ ఢిల్లీకి: కాంగ్రెసు టి - ఎంపీలకు ఆజాద్ పిలుపు

By Srinivas

Published: Friday, July 29, 2011, 13:36 [IST]

న్యూఢిల్లీ: ప్రత్యేక తెలంగాణ రాష్ట్రం ప్రకటించాలని డిమాండ్ చేస్తూ రాజీనామాలు సమర్పించిన టి-కాంగ్రెసు పార్లమెంటు సభ్యులు న్యూఢిల్లీకి రావాల్సిందిగా పార్టీ అధిష్టానం శుక్రవారం పిలుపు వచ్చింది. తక్షణమే ఢిల్లీకి రావాల్సిందిగా ఎంపీలకు అధిష్టానం ఫోన్ చేసి తెలిపింది. ఈ నెల ఆగస్టు 1వ తేదిన వర్షాకాలపు పార్లమెంటు సమావేశాలు ప్రారంభం కానున్నాయి. ఇప్పటికే భారీ కుంభకోణాలలో కూరుకు పోయిన కేంద్రానికి వచ్చే పార్లమెంటు సమావేశాలలో సొంత పార్టీ ఎంపీల నుండి ఎలాంటి అవాంఛనీయ సంఘటనలు ఎదురు కాకుండా ఉండేందుకు టి-ఎంపీలను వారి రాజీనామాలపై బుజ్జగించే ప్రయత్నాలు చేస్తోంది. ఇందుకోసం తక్షణమే ఢిల్లీకి రావాలని ఆజాద్ వారికి ఫోన్ చేసి చెప్పారు.

వారితో తెలంగాణ అంశంపై చర్చించి రాజీనామాలపై వారిని వెనక్కి తగ్గించే ప్రయత్నాలలో భాగంగానే అధిష్టానం పిలిచిందనే వార్తలు వినిపిస్తున్నాయి. నిజామాబాద్ ఎంపీ మధుయాష్కీ, మహబూబాబాద్ ఎంపీ బలరాం నాయక్ ఇప్పటికే ఢిల్లీలో ఉన్నారు. మరికొందరు ఎంపీలు శుక్రవారం ఢిల్లీ వెళ్లనున్నారు. ఇక్కడి నుండి ఎవరూ వెళ్లని పరిస్థితి ఉంటే అక్కడే ఉన్న యాష్కీ, బలరాం నాయక్ ఆజాద్‌తో రాజీనామాలపై చర్చించే అవకాశం ఉంది. కాగా ఎంపీ గుత్తా సుఖేందర్ రెడ్డి మాట్లాడుతూ ఆజాద్ ఢిల్లీకి రమ్మని చెబితే రెండు రోజుల తర్వాత వచ్చి కలుస్తామని చెప్పామని, ఆజాద్ భేటీకి అంత ప్రాధాన్యత ఉండదని చెప్పారు.

Published On July 29, 2011