జగన్ కోసం కెసిఆర్ రైల్‌రోకో రద్దు చేశారు: ఎర్రబెల్లి

హైదరాబాద్: వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డితో మ్యాచ్ ఫిక్సింగ్ చేసుకొని ఆయన ప్లీనరీకి ఎలాంటి అడ్డు ఉండకూడదని తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు గత నెలలో రైలురోకోను వాయిదా వేసుకున్నాడని తెలుగుదేశం పార్టీ సీనియర్ శాసనసభ్యుడు ఎర్రబెల్లి దయాకర రావు సోమవారం విమర్శించారు. పార్లమెంటులో తెలంగాణ బిల్లు పెట్టాలనే డిమాండుతో తెలంగాణ తెలుగుదేశం ప్రజా ప్రతినిధులు సోమవారం ఇందిరా పార్కు వద్ద ఒక్కరోజు దీక్షను ఆరంభించారు. అంతకుముందు ఎర్రబెల్లి ఓ టీవీ ఛానల్‌తో మాట్లాడారు. తెలుగుదేశం పార్టీ చేస్తున్న దీక్షను అడ్డుకోవడానికే కెసిఆర్ ఆగస్టు 1న రాస్తారోకోలకు పిలుపునిచ్చారని ఆరోపించారు.

అదే గత నెలలో జగన్ ప్లీనరీకి అడ్డుగా ఉండకూడదని రైలురోకోను రద్దు చేసుకున్నారని అన్నారు. కెసిఆర్, జగన్ కుమ్మక్కుకు ఇదే మంచి నిదర్శనం అని చెప్పారు. తెలంగాణ వాదులు వారి ఉద్దేశ్యాలను అర్థం చేసుకోవాలని కోరారు. కేంద్ర ప్రభుత్వం వెంటనే తెలంగాణ బిల్లును శీతాకాలపు పార్లమెంటు సమావేశాలలో పెట్టాలని డిమాండ్ చేశారు. 14ఎఫ్ ఎత్తి వేసే వరకు ఎస్సై పరీక్షలను నిర్వహించరాదని ఆయన ముఖ్యమంత్రి కిరణ్ కుమార్ రెడ్డిని డిమాండ్ చేశారు. ఒకరిద్దరు రాజీనామాలు చేస్తే తెలంగాణ రాదని ఉప ఎన్నికలు వస్తాయని చెప్పారు. రాజ్యాంగ సంక్షోభం ద్వారానే తెలంగాణ వస్తుందన్నారు. ఈ దీక్షలో 19 శాసనసభ్యులు, నలుగురు శాసనమండలి సభ్యులు పాల్గొన్నారు. అంతకుముందు తెలంగాణ అమరవీరులకు సంతాపం తెలిపారు.

English summary

Telugudesam party senior MLA Errabelli Dayakar Rao blamed TRS chief K Chandrasekhar Rao for rasta rokhos. He accused that KCR colluded with YSR chief YS Jagan.