వైయస్సార్ విగ్రహాల ధ్వంసం, రాస్తారోకోతో ఉద్రిక్తత

By Pratap

Published: Monday, August 1, 2011, 12:53 [IST]

కర్నూలు: కర్నూలు జిల్లాలో గుర్తు తెలియని వ్యక్తులు దివంగత నేత వైయస్ రాజశేఖర రెడ్డి విగ్రహాలను ధ్వంసం చేశారు. వైయస్సార్ కాంగ్రెసు పార్టీ అధ్యక్షుడు వైయస్ జగన్ కర్నూలు జిల్లాలో ఓదార్పు యాత్ర చేస్తున్న ప్రస్తుత తరుణంలో ఈ సంఘటనలు చోటుచేసుకోవడం తీవ్ర ఉద్రిక్తతకు దారి తీసింది. కర్నూలు జిల్లాలో నాలుగు వైయస్సార్ విగ్రహాలకు నిప్పు పెట్టి, వాటిని ధ్వంసం చేశారు.

నందికొట్కూరులో జగన్ ఆవిష్కరించిన విగ్రహాన్ని దుండగులు ధ్వంసం చేశారు. మద్దిచెర్వు మండలం ఆగ్రహారం గ్రామంలో, కొడుమూరు మండలం ఎర్రగుంట్ల గ్రామంలో వైయస్సార్ విగ్రహాలను ధ్వంసం చేశారు. ఈ విగ్రహాల ధ్వంసంతో వైయస్సార్ అభిమానులు ఆందోళనకు దిగారు. మాజీ శానససభ్యురాలు గౌరు చరిత నందికొట్కూరులో రోడ్డుపై బైఠాయించారు. దీంతో కర్నూలు - గుంటూరు రోడ్డుపై ట్రాఫిక్ పెద్ద యెత్తున నిలిచిపోయింది.

Published On August 1, 2011