చంద్రబాబు గురించి ఎన్టీఆరే చెప్పారు: వైయస్ జగన్

విజయవాడ: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబునాయుడు అవినీతిపరుడు అని సాక్ష్యాత్తూ ఆయన మామ, తెలుగుదేశం పార్టీ వ్యవస్థాపకులు దివంగత నందమూరి తారక రామారావు చెప్పారని వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి బుధవారం కృష్ణా జిల్లా ఓదార్పు యాత్రలో అన్నారు. చంద్రబాబు ప్రతిపక్ష నేతగా ఉండటం రాష్ట్ర ప్రజల ఖర్మ అన్నారు. తాను ప్రజల్లోకి వెళ్లినప్పుడే రాష్ట్రంలోని సమస్యలు చంద్రబాబుకు గుర్తుకు వస్తున్నాయని విమర్శించారు. వామపక్షాలు చంద్రబాబుతో ఎలా కలిశాయో చెప్పాలన్నారు. ప్రస్తుతం దారుణమైన స్థితిలో రాష్ట్రం ఉందన్నారు. రైతులు వరి కన్నా ఉరే మేలని భావించి పరిస్థితి తయారయిందన్నారు.

కాంగ్రెసు బ్యూరో ఆఫ్ ఇన్వెస్టిగేషన్ తనపై ఎన్ని ఆరోపణలు చేసిన నిరూపించలేరన్నారు. సుప్రీం కోర్టు తీర్పు తనకు అనుకూలంగా వస్తుందని ఆయన ఆశాభావం వ్యక్తం చేశారు. కాంగ్రెసు తనపై ఎంత బురద చల్లినప్పటికీ ప్రజలు నమ్మరని త్వరలో తెలుస్తుందన్నారు. ప్రధానమంత్రి మన్మోహన్ సింగ్‌కు తన తల్లి, పులివెందుల శాసనసభ్యురాలు వైయస్ విజయమ్మ లేఖ రాయడాన్ని తప్పుదోవ పట్టిస్తున్నారన్నారు. కాగా కోడూరు, వెల్లటూరు తదితర గ్రామాల్లో జగన్ ఓదార్పు యాత్ర చేపట్టారు. పలుచోట్ల వైయస్ విగ్రహాలను ఆవిష్కరించారు.

English summary

YSRC party president YS Jaganmohan Reddy said today in his Odarpu that late NTR told Chandrababu is very corrupt.