చంద్రబాబుపై ధ్వజమెత్తిన ఎమ్మెల్యే కెటి రామారావు

By Pratap

Published: Saturday, August 27, 2011, 15:09 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడిపై తెలంగాణ రాష్ట్ర సమితి (తెరాస) శాసనసభ్యుడు కెటి రామారావు తీవ్రంగా ధ్వజమెత్తారు. ఎమ్మార్ ప్రాపర్టీస్ వ్యవహారంపై ఆయన శనివారం మీడియా ప్రతినిధుల సమావేశంలో చంద్రబాబును తప్పు పట్టారు. ఎమ్మార్ వ్యవహారంతో సంబంధం లేకపోతే చంద్రబాబు బంధువులకే ఎందుకు విల్లాలు దక్కాయని ఆయన అడిగారు. ఎమ్మార్ ప్రాపర్టీస్‌లో విల్లాల కేటాయింపులు పారదర్శకంగా జరగలేదని, పారదర్శకంగా జరిగి ఉంటే సామాన్యులకు కూడా విల్లాలు దక్కేవని, చంద్రబాబు ప్రమేయం ద్వారానే విల్లాల కేటాయింపులు జరిగాయని ఆయన అన్నారు.

తెలంగాణలో తెలుగుదేశం పార్టీ సమాధి కావడం ఖాయమని ఆయన అన్నారు. అవినీతిపై సీమాంధ్రలో విద్యార్థులతో సమావేశాలు నిర్వహిస్తున్న చంద్రబాబు తెలంగాణ విద్యార్థులతో ఎందుకు సమావేశాలు నిర్వహించరని ఆయన అడిగారు. రాష్ట్ర ప్రజల్లో అయోమయం సృష్టించడానికి, తిమ్మిని బమ్మిని చేయడానికి సీమాంధ్ర పార్లమెంటు సభ్యులు బిజెపి నేత సుష్మా స్వరాజ్‌పై సభా హక్కుల ఉల్లంఘన నోటీసు ఇచ్చారని ఆయన విమర్శించారు.

Published On August 27, 2011