తెలంగాణ బాధ్యత కాంగ్రెసుకే ఎక్కువ: జూపల్లి

By Srinivas

Published: Sunday, September 4, 2011, 12:48 [IST]

హైదరాబాద్: తెలంగాణ రాష్ట్రం విషయంలో అన్ని పార్టీల కంటే కాంగ్రెసు పార్టీకే ఎక్కువ బాధ్యత ఉందని మాజీ మంత్రి జూపల్లి కృష్ణారావు అన్నారు. తెలంగాణ కోసం కేంద్రంపై ఒత్తిడి తేవడంలో తెలంగాణ కాంగ్రెసు ప్రజా ప్రతినిధులు విఫలమవుతున్నారనే సంకేతాలు వినిపిస్తున్నాయన్నారు. కాంగ్రెసు నేతలు తెలంగాణ కోసం చిత్తశుద్ధితో ఉన్నారన్నారు. సకల జనుల సమ్మెకు తమ మద్దతు ఉంటుందని చెప్పారు. తెలంగాణ కోసం ఉద్యోగులు సమ్మె చేస్తున్నప్పుడు రాజకీయ పార్టీలు ఉద్యోగులను ఆదర్శంగా తీసుకోవాలన్నారు.

2014 వరకు తెలంగాణ వస్తుందన్న టిఆర్ఎస్ అధ్యక్షుడు కల్వకుంట్ల చంద్రశేఖర రావు వ్యాఖ్యలు సరికావన్నారు. తెలంగాణ కోసమే పార్టీని స్థాపించిన కెసిఆర్ ఉద్యమంపై నీళ్లు చల్లేలా మాట్లాడటం సరికాదన్నారు. ఉద్యమం చేస్తున్నప్పుడు విజయమో వీరస్వర్గమో తేల్చుకోవాలన్నారు. పార్టీలు ఎవరికీ ప్రధానం కాదన్నారు. తెలంగాణ ముఖ్యమన్నారు. తెలంగాణ కోసం కలిసి వచ్చే వారందరినీ కలుపుకొని పోవాలని జెఏసి, కెసిఆర్‌కు సూచించారు.

Published On September 4, 2011