రాయపాటి, కావూరిలపై తెలంగాణ కాంగ్రెసు ధ్వజం

నల్గొండ/వరంగల్: తెలంగాణ రావడం అసంభవమని చెప్పిన మంత్రి టిజి వెంకటేష్, పార్లమెంటు సభ్యులు కావూరి సాంబశివ రావు, రాయపాటి సాంబశివ రావులపై తెలంగాణ కాంగ్రెసు ప్రజా ప్రతినిధులు సోమవారం తీవ్రస్థాయిలో ధ్వజమెత్తారు. మంత్రి టిజి వెంకటేష్, పార్లమెంటు సభ్యుడు కావూరి సాంబశివ రావు రెచ్చగొట్టే వ్యాఖ్యలు మానుకోవాలని లేదంటే తగిన బుద్ధి చెబుతామని మంత్రి జానారెడ్డి నల్గొండ జిల్లాలో హెచ్చరించారు. ప్రత్యేక తెలంగాణ రాష్ట్రం కాంగ్రెసు పార్టీతోనే సాధ్యమని, అలా కాకుండా తెలంగాణను మరెవరైనా తీసుకు వస్తామని చెబితే వారి వెంట నడిచేందుకు సిద్ధంగా ఉన్నామన్నారు. సకల జనుల సమ్మెకు తమ మద్దతు ఉంటుందని చెప్పారు. సభలు, సమావేశాల ద్వారా తెలంగాణ సాధించలేమన్నారు. తెలంగాణ రాష్ట్ర సమితి ప్రజలను తప్పుదోవ పట్టిస్తోందని ఆరోపించారు.

తెలంగాణకు వ్యతిరేకంగా మాట్లాడిన వారిని తెలంగాణలో తిరగనివ్వమని మరో మంత్రి కోమటిరెడ్డి వెంకట్ రెడ్డి హెచ్చరించారు. సకల జనుల సమ్మెకు మద్దతు ఇస్తామని వరంగల్ జిల్లాలో మంత్రి బస్వరాజు సారయ్య, ఎంపీలు రాజయ్య, బలరాం నాయక్ వేరువేరుగా అన్నారు. తెలంగాణకు వ్యతిరేకంగా మాట్లాడిన రాయపాటి సాంబశివరావు, కావురి సాంబశివ రావు, టిజి వెంకటేష్‌లను బర్తరఫ్ చేయాలని డిమాండ్ చేశారు. సిపిఐ రాష్ట్ర కార్యదర్శి నారాయణ సైతం టిజి, రాయపాటి, కావూరిలపై ప్రకాశం జిల్లాలో మండిపడ్డారు.

English summary

Telangana Congress leaders fired at MPs Rayapati Samba Siva Rao and Kavuri Sambasiva Rao today for their comments against Telangana.