తెలంగాణ చర్చలపై కిరణ్ కుమార్ రెడ్డి నో కామెంట్

న్యూఢిల్లీ: తమ కాంగ్రెసు అధిష్టానంతో తెలంగాణపై జరిపిన చర్చలపై మీడియాతో మాట్లాడడానికి ముఖ్యమంత్రి కిరణ్ కుమార్ రెడ్డి నిరాకరించారు. ప్రణబ్ నేతృత్వంలో అధిష్టానం పెద్దలు జరుపుతున్న చర్చలకు ఆయన శనివారం హాజరయ్యారు. వారితో చర్చల తర్వాత మీడియా సమీపించి, ప్రశ్నించగా - మాట్లాడడానికి ఏముందంటూ వెళ్లిపోయారు. అధిష్టానం పిలుపుతో ఆయన ఢిల్లీకి చేరుకున్నారు. ముఖ్యమంత్రికి ముందు అధిష్టానం పెద్దల సమావేశానికి ఉప ముఖ్యమంత్రి దామోదర రాజనర్సింహ హాజరయ్యారు.

కిరణ్ కుమార్ రెడ్డి తర్వాత తెలంగాణకు చెందిన కేంద్ర మంత్రి ఎస్ జైపాల్ రెడ్డి సమావేశానికి వచ్చారు. తన అభిప్రాయాలు అందరికీ తెలుసునని ఆయన సమావేశానికి వెళ్లే మందు మీడియా ప్రతినిధులతో అన్నారు. ప్రణబ్ నేతృత్వంలోని మినీ కోర్ కమిటీ ముందు శనివారం ఉదయం నుంచి పలువురు ముఖ్య నేతలు హాజరయ్యారు. సీమాంధ్రకు చెందిన కేంద్ర మంత్రులు దగ్గుబాటి పురంధేశ్వరి, పళ్లంరాజు, పనబాక లక్ష్మి కోర్ కమిటీ ముందుకు వచ్చారు. రాష్టంపై తనకు ఉన్న అవగాహనను పార్టీ పెద్దలకు వివరించానని జైపాల్ రెడ్డి అన్నారు.

English summary

CM Kiranlumar Reddy has rejected to speak on talk with Congress core committee members on Telangana.