తెలంగాణలో కెసిఆర్‌ను అడ్డుకున్న టిటిడిపి

By Srinivas

Published: Monday, October 10, 2011, 12:54 [IST]

అదిలాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు అదిలాబాదులో చుక్కెదురయింది. జిల్లాలో పర్యటిస్తున్న ఆయనను తెలుగుదేశం పార్టీ కార్యకర్తలు అడ్డుకున్నారు. నిర్మల్, మంచిర్యాల టౌన్ తదితర ప్రాంతాలలో కెసిఆర్‌ను అడ్డుకునే ప్రయత్నాలు చేశారు. పలుచోట్ల రాస్తారోకోలు, ధర్నాలు చేశారు. తెలంగాణ కోసం అందరిని రాజీనామా చేయమని చెప్పే కెసిఆర్ మొదట రాజీనామా చేయాలని డిమాండ్ చేశారు. ఉద్యమం పేరుతో కెసిఆర్ తెలంగాణ ప్రజలను మోసం చేస్తున్నారని ఆరోపించారు.

అదిలాబాద్ చేరుకున్న కెసిఆర్ తెలంగాణ రాజకీయ ప్రజా ప్రతినిధులపై అగ్గిమీద గుగ్గిలం అయ్యారు. రాజకీయ నేతలు దద్దమ్మలన్నారు. ఇంత ఉద్యమం జరుగుతున్నా వారిలో చలనం లేదన్నారు. ఉద్యోగులే ఉద్యమాన్ని నడిపిస్తున్నారన్నారు. టిఎన్జీవోలను సువర్ణాక్షరాలతో లిఖించాలన్నారు. రాష్ట్రం వచ్చేదాకా సమ్మె కొనసాగుతుందన్నారు. తెలంగాణలోని ముస్లింలంతా ప్రత్యేక రాష్ట్రానికి అనుకూలంగా ఉన్నారన్నారు.

Published On October 10, 2011