నమస్తే తెలంగాణలో సీమాంధ్ర పెట్టుబడులు: ఎర్రబెల్లి

కరీంనగర్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు చెందిన నమస్తే తెలంగాణ దినపత్రికలో పెట్టుబడులపై తెలుగుదేశం తెలంగాణ ఫోరం కన్వీనర్ ఎర్రబెల్లి దయాకర్ రావు సవాల్ విసిరారు. నమస్తే తెలంగాణలో సీమాంధ్ర పెట్టుబడులు లేవని నిరూపిస్తే తాను రాజకీయ సన్యాసం తీసుకుంటానని ఆయన సవాల్ చేశారు. ఆంధ్ర పెట్టుబడులు నమస్తే తెలంగాణలో ఉన్నాయని తాను రజువు చేయడానికి సిద్ధంగా ఉన్నానని ఆయన అన్నారు. తెలంగాణ విషయంలో కెసిఆర్ శకుని పాత్ర పోషిస్తున్నారని ఆయన ఆదివారం మీడియా ప్రతినిధుల సమావేశంలో వ్యాఖ్యానించారు. ఇతర పార్టీలన్నీ వెలివేసన నాయకులే తెరాసలో ఉన్నారని ఆయన అన్నారు.

తెలంగాణ ఉద్యోగుల జెఎసితో కలిసి పనిచేయడానికి తాము సంసిద్ధత వ్యక్తం చేసినా ఎందుకు కలుపుకోవడం లేదని ఆయన అడిగారు. రాష్ట్ర ప్రభుత్వం నవంబర్ 2వ తేదీ నుంచి తలపెట్టిన రచ్చబండ కార్యక్రమాన్ని రచ్చరచ్చ చేస్తామని ఆయన అన్నారు. తెలంగాణ మంత్రులు, శాసనసభ్యులు ఏ ముఖం పెట్టుకుని రచ్చబండ కార్యక్రమంలో పాల్గొంటారని ఆయన అడిగారు. రచ్చబండ కార్యక్రమాన్ని తాము బహిష్కరిస్తున్నట్లు ఆయన తెలిపారు.

English summary

Telugudesam Telangana forum convenor Errabelli Dayakar Rao lashed out at TRS president K Chandrasekhar Rao.