కెసిఆర్ విలీనం వ్యాఖ్యలను తేలిగ్గా కొట్టేసిన బొత్స

By Pratap

Published: Monday, October 31, 2011, 13:34 [IST]

హైదరాబాద్: కాంగ్రెసు పార్టీయే తెరాసలో విలీనమవుతుందని కె. చంద్రశేఖర రావు చేసిన వ్యాఖ్యలను ప్రదేశ్ కాంగ్రెసు కమిటీ (పిసిసి) అధ్యక్షుడు బొత్స సత్యనారాయణ తేలిగ్గా కొట్టేశారు. కాంగ్రెసు తెరాసలో విలీనమవుతుందని కెసిఆర్ చేసిన వ్యాఖ్యలు అర్థరహితం, హాస్యాస్పదమని ఆయన సోమవారం మీడియా ప్రతినిధుల సమావేశంలో అన్నారు. పార్టీకి రాజీనామా చేసి తెరాసలో చేరిన ముగ్గురు శానససభ్యులపై ఆయన తన వ్యాఖ్యను పునరుద్ఘాటించారు. సోమారపు సత్యనారాయణ, జూపల్లి కృష్ణారావు, రాజయ్య తెలంగాణ కోసం రాజీనామా చేయలేదని ఆయన అన్నారు. వ్యక్తిగత ప్రయోజనం కోసం, వ్యక్తిగత ఆలోచన మేరకు మాత్రమే ఆ ముగ్గురు పార్టీ మారారని ఆయన అన్నారు. తెలంగాణకోసమైతే మూకుమ్మడిగా రాజీనామాలు చేసేవారని ఆయన అభిప్రాయపడ్డారు. పార్టీ నుంచి వెళ్లిపోయినవారి వ్యాఖ్యల గురించి తాను మాట్లాడబోనని, ఏ పార్టీ ఏ పార్టీలో విలీనమవుతుందో చూద్దామని ఆయన అన్నారు.

శాసనసభలో విశ్వాసం కోరాల్సిన అవసరం తమ ప్రభుత్వానికి లేదని ఆయన అన్నారు. ప్రతిపక్షాలు అవిశ్వాస తీర్మానం ప్రతిపాదిస్తే వంద శాతం నెగ్గుతామని ఆయన దీమా వ్యక్తం చేశారు. తెలంగాణ కోసం నవంబర్ 1వ తేదీ నుంచి తలపెట్టిన దీక్షను మానుకోవాలని మాజీ మంత్రి కోమటిరెడ్డి వెంకటరెడ్డిని కోరుతామని ఆయన చెప్పారు. తెలంగాణపై కాంగ్రెసుకు చిత్తశుద్ధి ఉందని ఆయన అన్నారు. కాంగ్రెసు పార్టీని వీడి తెరాసలో చేరిన శానససభ్యులది తొందరపాటు చర్యేనని కాంగ్రెసు ఎమ్మెల్సీ డి. శ్రీనివాస్ అన్నారు. ముగ్గురు శాసనసభ్యుల రాజీనామాతో ప్రభుత్వం మైనారిటీలో పడలేదని ఆయన అన్ారు. ప్రతిపక్షాలు ప్రభుత్వంపై అవిశ్వాసం పెట్టుకోవచ్చునని ఆయన అన్నారు.

ముగ్గురు శానససభ్యులు తమ కాంగ్రెసు పార్టీని వీడడం వారి వ్యక్తిగత నిర్ణయమని ఉప ముఖ్యమంత్రి దామోదర రాజనర్సింహ సోమవారం మహబూబ్‌నగర్‌లో అన్నారు. ముగ్గురు శాసనసభ్యుల రాజీనామా వల్ల ప్రభుత్వానికి ఏ విధమైన ముప్పు లేదని ఆయన అన్నారు. ముఖ్యమంత్రి కిరణ్ కుమార్ రెడ్డి ఐదేళ్లు రాష్ట్రాన్ని పాలిస్తారని ఆయన అన్నారు. కాంగ్రెసు పార్టీ సముద్రంలాంటిదని, అందులోకి వస్తుంటారూ పోతుంటారని ఆయన అన్నారు.

Published On October 31, 2011