సెంటిమెంటుతో కెసిఆర్ కోట్లు సంపాదిస్తున్నాడు: ఎర్రబెల్లి

By Srinivas

Published: Monday, October 31, 2011, 13:54 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుపై తెలుగుదేశం పార్టీ సీనియర్ శాసనసభ్యులు మోత్కుపల్లి నర్సింహులు, ఎర్రబెల్లి దయాకర రావు సోమవారం తీవ్రస్థాయిలో ధ్వజమెత్తారు. కెసిఆర్ తెలంగాణ ద్రోహి అన్నారు. రెండు వారాల్లో తెలంగాణ వస్తుందని ఇటీవల చెప్పి ఇప్పుడు 2014 వరకు అంటున్నాడని ఆయన నాటకాల వల్లనే తెలంగాణ ఆలస్యమవుతుందన్నారు. సెంటిమెంటును అడ్డం పెట్టుకొని వేల కోట్ల రూపాయలు సంపాదించారని ధ్వజమెత్తారు. కెసిఆర్ తన పద్ధతి మార్చుకోవాలని, టిఆర్ఎస్ ఒక్క పార్టీ వల్లే తెలంగాణ రాదని ఆ విషయం కెసిఆర్‌కు కూడా తెలుసున్నారు.

వచ్చే శీతాకాల సమావేశాల్లో టిడిపి ముఖ్యమంత్రి కిరణ్ కుమార్ రెడ్డి ప్రభుత్వంపై అవిశ్వాస తీర్మానం పెడుతుందన్నారు. తెలంగాణ కోసం న్యూఢిల్లీలో దీక్ష చేస్తున్న కొండా లక్ష్మణ్ బాపూజీకి తమ మద్దతు ఉంటుందన్నారు. కెసిఆర్‌కు నిజాం ఎలా గొప్పవాడో చెప్పాలన్నారు. తెలంగాణ ప్రజలను ముప్పుతిప్పలు పెట్టిన నిజాం గొప్పవాడు ఎలా అవుతాడన్నారు. నిజాం లాగే కెసిఆర్ నియంత అన్నారు. కెసిఆర్ సలహాలు తమకు ఏమాత్రం అవసరం లేదన్నారు.

Published On October 31, 2011