ఎమ్మెల్యేల కోసం స్పీకర్ నాదెండ్ల ఎదురు చూపు

హైదరాబాద్: ఇన్నాళ్లూ తమ రాజీనామాలు ఆమోదించాలంటూ స్పీకర్ చుట్టూ తిరిగిన శాసనసభ్యులను చూశాం. కానీ మంగళవారం మాత్రం స్పీకర్ నాదెండ్ల మనోహరే రాజీనామాలు చేసిన ఎమ్మెల్యేల కోసం నిరీక్షించాల్సి వచ్చింది. ఎమ్మెల్యేలు జోగు రామన్న, గంప గోవర్ధన్‌లను కార్యాలయానికి హాజరు కావాలని స్పీకర్ మంగళవారం సమాచారం పంపారు. వారి కోసం మూడు గంటల నుంచి నాలుగున్నర గంటల వరకు ఎదురు చూశారు. తనకు స్పీకర్ కార్యాలయం నుంచి పిలుపు వచ్చిందని జోగు రామన్న విలేకరులకు వివరించారు. పాదయాత్ర చేపడుతున్నందున ఈ నెల 21 తర్వాత వస్తానని సమాచారం ఇచ్చానని, అయినా హాజరు కావాల్సిందేనంటూ అసెంబ్లీ కార్యాలయ అధికారులు తనతో చెప్పారని అన్నారు.

మళ్లీ సమాచారం ఇస్తామనడంతో తాను హైదరాబాద్‌కు వచ్చానని చెప్పారు. కానీ, తనకు మళ్లీ సమాచారం లేకపోవడంతో అక్కడికి వెళ్లలేదన్నారు. మరోవైపు గంప గోవర్ధన్ స్పీకర్ ఇంటికి వెళ్లి కలిశారు. పార్టీ మారినందున తన రాజీనామాను ఆమోదించాలని స్పీకర్‌కు విజ్ఞప్తి చేశారు. కాంగ్రెస్ ఎమ్మెల్యేలు జూపల్లి కృష్ణారావు, టి.రాజయ్య, స్వతంత్ర ఎమ్మెల్యే సోమారపు సత్యనారాయణలకు కూడా కబురు పంపాలని అసెంబ్లీ కార్యదర్శి రాజాసదారామ్‌ను స్పీకర్ మనోహర్ ఆదేశించారని సమాచారం.

English summary

Speaker Nadendla Manohar waited for one and half an hour at his chamber for MLAs Gampa Govardhan and Jogu Ramanna.