సిబిఐ విచారణపై మాట్లాడడానికి బాబు నిరాకరణ

By Pratap

Published: Tuesday, November 22, 2011, 17:58 [IST]

హైదరాబాద్: తన ఆస్తులపై జరిగే సిబిఐ విచారణపై మాట్లాడేందుకు తెలుగుదేశం పార్టీ అధ్యక్షుడు నారా చంద్రబాబు నాయుడు నిరాకరించారు. రాష్ట్ర మానవ హక్కుల కమిషన్ (హెచ్‌ఆర్‌సి) చైర్మన్ నియామకంపై చర్చించడానికి సచివాలయం వచ్చిన ఆయన మంగళవారం సాయంత్రం మీడియా ప్రతినిధులతో మాట్లాడారు. ఈ సందర్భంగా సిబిఐ విచారణపై మీడియా ప్రతినిధులు అడిగినప్పుడు తర్వాత మాట్లాడుతానంటూ వెళ్లిపోయారు. హెచ్ఆర్‌సి చైర్మన్‌గా నిసార్ అహ్మద్ కక్రూ పేరును ఆయన బలపరిచారు. హైకోర్టు ప్రధాన న్యాయమూర్తిగా పనిచేసిన కక్రూ మైనారిటీకి చెందినవారు కావడం వల్లనే తాను ప్రభుత్వ ప్రతిపాదనను బలపరిచినట్లు ఆయన తెలిపారు.

ముఖ్యమంత్రి కిరణ్ కుమార్ రెడ్డి ఏడాది పాలన సాధించిందేమీ లేదని ఆయన అన్నారు. అన్ని రంగాల్లో పాలన స్తంభించిపోయిందని, ప్రభుత్వం పనిచేయడం లేదని ఆయన అన్నారు. రైతుల పరిస్థితి అధ్వాన్నంగా ఉందని ఆయన అన్నారు. రైతులు ఆత్మహత్యలు చేసుకుంటున్నారని, అయినా ప్రభుత్వం రైతులను పట్టించుకోవడం లేదని ఆయన అన్నారు. రైతు సమస్యలను పరిష్కరించడానికి ముందుకు రాకపోతే ప్రభుత్వంపై అవిశ్వాస తీర్మానం ప్రతిపాదిస్తామని ఆయన చెప్పారు.

Published On November 22, 2011