నెల్లూరు జిల్లాలో భారీ వర్షాలు, గ్రామాలు దిగ్బంధం

నెల్లూరు: శ్రీ పొట్టి శ్రీరాములు నెల్లూరు జిల్లాలో భారీ వర్షాలు కురుస్తుండటంతో పలు గ్రామాలు దిగ్బంధమయ్యాయి. ముఖ్యంగా జిల్లాలోని గూడురు, కావలి తదితర మండలాల్లో రెండు రోజులుగా భారీ వర్షాలు కురుస్తుండటంతో సుమారు 50 గ్రామాలు జలదిగ్బంధంలో ఉండిపోయాయి. కైవల్య, కాళంగి, స్వర్ణముఖి తదితర నదులు పొంగి పొర్లుతున్నాయి. కావలి తీరప్రాంతంలో అలలు ఎగిసి పడుతున్నాయి. పట్టుపాలెం, తుమ్మలపెంట తదితర తీర ప్రాంతాలలో సముద్రం సుమారు 20 మీటర్లు ముందుకు వచ్చింది.

దీంతో మత్స్యకారులు సముద్రంలో వేటను నిలిపేశారు. ఎప్పుడు ఏ ఉపద్రవం వచ్చి పడుతుందోనని మత్స్యకార గ్రామాలు ఆందోళన చెందుతున్నాయి. కాళంగి నది పొంగుతున్న దొరవారిసత్రం మండలం తన్నీరుకమ్మగండ్రిక వద్ద ఓ వ్యక్తి ఏరుదాటుతుండగా కొట్టుకు పోయాడు. బాలాయపల్లి మండలంలోని పి.కొత్తపాలెం గ్రామంలో చెరువుకు గండి పడింది. చెన్నై, తిరుపతి, రాజంపేట, నెల్లూరు, గూడురు తదితర మార్గాల్లో రైళ్ల రాకపోలకలు అంతరాయం ఏర్పడింది. అల్పపీడన ధ్రోణి ప్రభావంతో బంగాళాఖాతం ఉగ్రరూపమెత్తింది.

కాగా జిల్లాలో విస్తారంగా వర్షాలు కురుస్తున్న నేపథ్యంలో అధికార యంత్రాంగాన్ని అప్రమత్తం చేశామని కలెక్టర్ చెప్పారు. అధికారులంతా ఆదివారం విధుల్లోనే ఉన్నారని చర్యలు చేపడుతున్నారన్నారు. ఇప్పడి వరకు ఎక్కడా ప్రాంతాలు ముంపుకు గురి కాలేదన్నారు. ఒకవేళ అలాంటి పరిస్థితి ఎదురైనా సహాయక చర్యలకు సిద్ధంగా ఉన్నామని చెప్పారు.

English summary

Heavy rains in Sri Potti Sriramulu Nellore district for 24 hours. Fishermen stopped their fish hunting.